રાજ્યસભામાં વિપક્ષના નવા નેતા:કોંગ્રેસે ખડગેને રાજ્યસભામાં વિપક્ષના નેતા બનાવ્યા; આઝાદનો કાર્યકાળ સમાપ્ત થવાથી પદ ખાલી થયું હતુ

કોંગ્રેસે રાજ્યસભામાં મલ્લિકાર્જુન ખડગેને વિપક્ષના નેતા બનાવવાનો નિર્ણય લીધો છે. આ માટે પાર્ટીએ રાજ્યસભાના અધ્યક્ષ વેંકૈયા નાયડુને આ બાબતની જાણકારી પણ આપી દીધી છે. ખડગે 2019ની લોકસભાની ચૂંટણી હારી ગયા હતા, ત્યારબાદ ગયા વર્ષે તેમને રાજ્યસભામાં સભ્ય તરીકે લાવવામાં આવ્યા હતા.

ગત લોકસભામાં કોંગ્રેસ સંસદીય દળના નેતા રહેલા ખડગેને હવે રાજયસભામાં ગુલામ નબી આઝાદની જગ્યાએ વિપક્ષનું નેતૃત્વ કરશે. ઉપલા ગૃહમાં આઝાદનો કાર્યકાળ 15 ફેબ્રુઆરીએ પુરો થવાનો છે, જેના માટે ગૃહમાં તેમને વિદાય પણ આપવામાં આવી છે.

મોદીએ કહ્યું હતું- નવા નેતા માટે આ કામ સરળ નહીં હોય
આઝાદને વિદાય આપતી વખતે વડાપ્રધાન નરેન્દ્ર મોદીએ મંગળવારે રાજ્યસભામાં કહ્યું હતું કે જે કોઈ ગુલામ નબીજી (વિપક્ષના નેતા) ની જગ્યા લેશે, તે માટે તેમને મેચ કરવાનું સરળ રહેશે નહીં. આવું એટલા માટે કે આઝાદ ફક્ત તેમની પાર્ટીની જ ચિંતા કરતાં ન હતા, પણ દેશ અને આ ગૃહની પણ ચિંતા કરતાં હતા.