કુનોમાં દમ તોડતાં ચિત્તા:માદા ચિત્તા જ્વાલાના 2 બચ્ચા મૃત્યુ પામ્યા, 1 ગંભીર; અત્યાર સુધીમાં 3 ચિત્તા સહિત 3 બચ્ચાના થયા મોત

કુનો નેશનલ પાર્કમાંથી ફરી ખરાબ સમાચાર આવ્યા છે. નામિબિયાથી લાવવામાં આવેલા ચિત્તાના વધુ બે બચ્ચા મૃત્યુ પામ્યા છે. આ પહેલા 23મેના રોજ પણ એક બચ્ચાનું મોત થયું હતું. તાજેતરમાં જ જ્વાલા નામની માદા ચિત્તાએ 4 બચ્ચાને જન્મ આપ્યો હતો. આ પછી એક બચ્ચાનું મોત થયું હતું. પરિસ્થિતિને જોતા બાકીના 3 બચ્ચા અને માદા ચિતા જ્વાલાને વન્યજીવ તબીબોની ટીમની દેખરેખ હેઠળ રાખવામાં આવ્યા હતા. આ સાથે કુનો નેશનલ પાર્કમાં અત્યાર સુધીમાં 3 બચ્ચા અને 3 ચિત્તાના મોત થયા છે.

મધ્યપ્રદેશના મુખ્ય મુખ્ય વન સંરક્ષક દ્વારા કહેવામાં આવ્યું છે કે 23મેના રોજ ગરમી વધારે હતી અને લૂ પણ વધુ હતી. જેના કારણે ત્રણેય બચ્ચાઓની અસામાન્ય સ્થિતિ અને ગરમીને જોતા મેનેજમેન્ટ અને વન્યજીવ તબીબોની ટીમે તાત્કાલિક ત્રણેય બચ્ચાને બચાવી લેવા અને જરૂરી સારવાર કરવાનો નિર્ણય લીધો હતો. પરંતુ તે દરમિયાન બે બચ્ચાની હાલત વધુ લથડતા તેઓનું સારવાર દરમિયાન મોત નીપજ્યું હતું.

1 બચ્ચાની સ્થિતિ ગંભીર
અધિકારી દ્વારા જણાવવામાં આવ્યું છે કે 1 બચ્ચાની હાલત હજુ પણ નાજુક છે અને તેને સારવાર માટે પાલપુરની હોસ્પિટલમાં રાખવામાં આવ્યું છે. અહીં તેની સતત સારવાર કરવામાં આવી રહી છે. સારવાર માટે ચિત્તા નિષ્ણાતો અને નામિબિયા અને દક્ષિણ આફ્રિકાના ડૉક્ટરો પાસેથી પણ સલાહ લેવામાં આવી રહી છે. તે જ સમયે, માદા ચિત્તા સ્વસ્થ છે અને તેને પણ નિરીક્ષણ હેઠળ રાખવામાં આવી છે.

ઓછું વજન અને ડિહાઇડ્રેશનને કારણે મૃત્યુ
તેમણે જણાવ્યું કે ચિત્તાના તમામ બચ્ચા ઓછા વજનવાળા અને અત્યંત ડિહાઈડ્રેટ હોવાનું જાણવા મળ્યું છે. ફિમેલ ચિત્તા જ્વાલા પહેલીવાર માતા બની છે. ચિત્તાના બચ્ચાની ઉંમર લગભગ 8 અઠવાડિયા છે અને આ તબક્કે ચિત્તાના બચ્ચા સામાન્ય રીતે જિજ્ઞાસુ હોય છે અને માતા સાથે ચાલે છે. ચિતાના બચ્ચા 8 થી 10 દિવસ પહેલા જ માતા સાથે ફરવા લાગ્યા હતા. ચિત્તા નિષ્ણાતોના મતે, સામાન્ય રીતે આફ્રિકામાં ચિત્તાના બચ્ચાનો જીવિત રહેવાનો દર ઘણો ઓછો છે. નિયમો અનુસાર બચ્ચાનું પોસ્ટમોર્ટમ કરવામાં આવી રહ્યું છે.

ગયા વર્ષે 20 ચિત્તા લાવવામાં આવ્યા હતા
ઉલ્લેખનીય છે કે, ગયા વર્ષે 17 સપ્ટેમ્બરે નામીબિયાથી કુનો નેશનલ પાર્કમાં 8 ચિત્તા લાવવામાં આવ્યા હતા. આ પછી દક્ષિણ આફ્રિકાથી 12 ચિત્તાઓની બીજી બેચ પણ અહીં લાવવામાં આવી હતી. પ્રોજેક્ટ ચિતા હેઠળ, ચિત્તાઓને ક્વોરન્ટાઇન રાખ્યા બાદ ખુલ્લા જંગલમાં છોડવાની પ્રક્રિયા તબક્કાવાર રીતે અપનાવવામાં આવી રહી છે. નામીબિયાથી લાવવામાં આવેલી માદા ચિતા જ્વાલા (સિયા)એ 24 માર્ચે જ પાર્કમાં 4 બચ્ચાને જન્મ આપ્યો હતો. જેમાંથી અત્યાર સુધીમાં 3 બચ્ચા મૃત્યુ પામ્યા છે.

3 ચિત્તાઓએ પણ જીવ ગુમાવ્યો
કુનોમાં માત્ર બચ્ચા જ નહીં, આ પહેલા ત્રણ ચિત્તાના પણ મોત થયા છે. હકીકતમાં 9 મેના રોજ, માદા ચિત્તા દક્ષા ઘાયલ અવસ્થામાં મળી હતી. તેનું સારવાર દરમિયાન મોત નિપજ્યું હતું. અને અગાઉ 23 એપ્રિલના રોજ ઉદય નામના ચિતાનું મૃત્યુ થયું હતું. તેની તબિયત લથડી હતી અને તેને ટ્રાન્ક્વીલાઈઝ કરીને મેડિકલ સેન્ટરમાં લાવવામાં આવ્યો હતો, પરંતુ સારવાર દરમિયાન તેનું મૃત્યુ થયું હતું. 26 માર્ચે એક માદા ચિત્તાનું પણ મૃત્યુ થયું હતું. શાશાને કિડનીમાં ઈન્ફેક્શન થયું હતું અને લગભગ બે મહિનાની સારવાર બાદ પણ તેને બચાવી શક્યા નહીં.