વિશાળ ભૌગોલિક વૈવિધ્ય ધરાવતા ભારતમાં કુદરતી આપત્તિઓની નવાઈ ન હોય પરંતુ આધુનિક સંસાધનોના ઉપયોગ અને ખાસ તો યોગ્ય તાલમેલ વડે તાલીમબદ્ધ ટીમ દ્વારા આપત્તિની વિનાશકતા ખાળી શકાય તે હેતુથી 2006માં NDRFની રચના કરવામાં આવી છે. NDRF એ પેરા મિલિટરી ફોર્સની તર્જ પર જ રચાયેલ દળ છે, જેમાં કુલ 12 બટાલિયન સામેલ છે. બોર્ડર સિક્યુરિટી ફોર્સ (BSF), સેન્ટ્રલ રિઝર્વ્ડ પોલીસ ફોર્સ (CRPF), ઈન્ડો તિબેટિયન બોર્ડર પોલીસ (ITBP) સહિતના દળોમાંથી ચુનંદા તાલીમબદ્ધ જવાનોને NDRFમાં ડેપ્યુટેશન આપવામાં આવે છે. 

આપત્તકાલીન પરિસ્થિતિમાં ઝડપભેર પહોંચી શકાય એ માટે દેશભરમાં ભૌગોલિક જરૂરિયાત મુજબ કુલ 12 સ્થાનો પર NDRFની ટીમ તૈનાત રાખવામાં આવે છે. જેમાં ગુજરાતમાં ગાંધીનગર ઉપરાંત મહારાષ્ટ્રમાં પુણેનો સમાવેશ થાય છે. એ સિવાય પૂર્વ ભારતના દરિયાકાંઠે સૌથી વધુ તોફાનો ઉદભવતા હોવાથી ઓડિશા, બંગાળ, તામિલનાડુ અને આસામમાં પણ NDRFની ટીમ મૌજુદ રહે છે. 

• તાજેતરમાં ઓડિશા, બંગાળને ધમરોળી ચૂકેલા ફાની વાવાઝોડાં વખતે NDRFની ટીમે અગાઉથી જ સતર્કતા દાખવીને જોખમી વિસ્તારમાં સ્થળાંતરની કામગીરી હાથ ધરી લીધી હતી. મોટા હોર્ડિંગ્ઝ ઉતરાવી લીધા હતા. ભયજનક ઈમારતો ખાલી કરાવી દીધી હતી અને તોતિંગ વૃક્ષોની ડાળીઓ પણ પાંખી કરાવી લીધી હતી. જેને લીધે જાનહાનિનું પ્રમાણ ખાસ્સું ઘટાડી શકાયું હતું. એ સિવાય ગુજરાતને પણ NDRFની ચોક્સાઈભરી કામગીરીનો અનુભવ થયેલો છે. 
• 3 જુલાઈ, 2007: ભારે વરસાદના પગલે સૌરાષ્ટ્રના રાજકોટ અને ભાવનગરમાં પૂર હોનારત સર્જાવાની સ્થિતિ ઊભી થઈ હતી ત્યારે NDRFની ટીમે હજારો લોકોના જીવ બચાવ્યા હતા અને સંખ્યાબંધ લોકોનું સહીસલામત સ્થળાંતર કરાવ્યું હતું. 
• 3 ફેબ્રુઆરી, 2008: અમદાવાદમાં કાલુપુર વિસ્તારમાં હોટેલ શાકુંતની ઈમારત ધસી પડતાં 8 લોકોના મોત થયા હતા એ દુર્ઘટના વખતે NDRFની ટીમે સત્વરે કામગીરી હાથ ધરી હતી અને 10થી વધુ લોકોના જીવ બચાવ્યા હતા.