• ઉત્તરાખંડમાં પણ અસર, પર્યટકો માટે 7 દિવસનું એલર્ટ જાહેર
• પાક.માં હિમવર્ષાથી 14 અને અફઘાનમાં વરસાદથી 19નાં મોત

શ્રીનગર / શિમલા: જમ્મુ-કાશ્મીર, હિમાચલપ્રદેશમાં સોમવારે ભારે હિમવર્ષા થઇ. હવામાન એજન્સી અનુસાર કેસ્પિયન સમુદ્રમાં ઊઠતાં પવનને લીધે અહીં હિમવર્ષા થઈ રહી છે. આ પવનને વેસ્ટર્ન ડિસ્ટર્બન્સ પણ કહેવાય છે. હાલ આ હવામાન સિસ્ટમ પર્વતો નજીક છે. તેના લીધે જમ્મુ-કાશ્મીર, હિમાચલ, ઉત્તરાખંડમાં મંગળવાર સાંજ સુધી હિમવર્ષા થઈ શકે છે. તેના પછી હવામાન સિસ્ટમ પૂર્વ તરફ વધશે જેનાથી 15 જાન્યુઆરીએ હવામાન સાફ થવા લાગશે. જોકે ઉત્તર હિમાચલપ્રદેશમાં હળવો વરસાદ નોંધાઈ શકે છે. ઉપરાંત વધુ એક વેસ્ટર્ન ડિસ્ટર્બન્સ 16 જાન્યુઆરીથી સક્રિય થશે. તેનાથી પર્વતો પર હિમવર્ષા થઇ શકે છે. એવામાં પર્યટકોએ એક અઠવાડિયા સુધી પર્વતોના પ્રવાસને પડતો મૂકવો જોઈએ. એક વેસ્ટર્ન ડિસ્ટર્બન્સ અફઘાનિસ્તાનમાં પણ છે. તેનાથી અફઘાન, પાકિસ્તાન, કાશ્મીરમાં હિમવર્ષા થઈ રહી છે.
કેસ્પિયન સમુદ્ર : તૂર્કમેનિસ્તાન, કઝાકિસ્તાન, રશિયા, અઝરબૈજાન, ઈરાન નજીકનું આ સરોવર દુનિયાનું સૌથી મોટું સમુદ્ર છે. તેનું ક્ષેત્રફળ 3.71 લાખ ચો.કિમી છે. તેનું પાણી ફક્ત બાષ્પીભવનથી નીકળે છે. તેમાં દુનિયાના કુલ સરોવરોનું આશરે 40 ટકા પાણી છે.
હિમાચલના કેલાંગમાં 18 ઈંચ હિમવર્ષા, કાશ્મીરમાં પરીક્ષા સ્થગિત, દ્રાસમાં પારો માઈનસ 10.5 ડિગ્રી

• હિમાચલના લાહોલ સ્ફીતિ, કિન્નૌર, કુલ્લુ, ચંબા અને મનાલી જિલ્લામાં સોમવારે હિમવર્ષા થઈ. લાહોલ સ્ફીતિના કેલાંગમાં સૌથી વધુ 18 ઈંચ હિમવર્ષા થઇ. અહીં તાપમાન -6 ડિગ્રી નોંધાયું. રાજ્યનું સૌથી ઠંડુ સ્થાન રહ્યું.
• જમ્મુ-કાશ્મીરના ગુલમર્ગમાં 27 સેમી હિમવર્ષા થઈ. હિમવર્ષાને લીધે જમ્મુ-શ્રીનગર નેશનલ હાઈવે બંધ કરાયો. શ્રીનગર-લેહ નેશનલ હાઈવે, મુઘલ રોડ 34 દિવસથી બંધ છે. આ રોડ એપ્રિલ-મેમાં ખૂલી શકશે.
• શ્રીનગરથી બીજા દિવસે ફ્લાઈટો રદ કરવી પડી. કાશ્મીરની ક્લસ્ટર યુનિવર્સિટીએ સ્થિતિ સુધરવા સુધી પરીક્ષાઓ સ્થગિત કરી. લદ્દાખના દ્રાસમાં ક્ષેત્રનું સૌથી ઓછું તાપમાન માઈનસ 10.5 ડિગ્રી રહ્યું.

પાક.માં હિમવર્ષાથી 14 અને અફઘાનમાં વરસાદથી 19નાં મોત
પાકિસ્તાનના બલુચિસ્તાન પ્રાંતના ક્વેટા જિલ્લામાં 24 કલાકમાં 48 ઈંચ હિમવર્ષા થઇ હતી. તેમાં 14 લોકો મૃત્યુ પામ્યા. અખબાર ડોન મુજબ બલુચિસ્તાનમાં ગત 20 વર્ષમાં ક્યારેય આવી હિમવર્ષા થઈ નથી. ક્વેટાનું એરપોર્ટ બરફમાં ઘેરાઈ ગયું છે. ફ્લાઈટો રદ કરાઈ છે.

• અફઘાનના 34 પ્રાંતમાંથી 21માં ભારે હિમવર્ષા અને વરસાદ પડી રહ્યો છે. અહીં ભારે વરસાદથી 19 લોકો મૃત્યુ પામ્યા.
• સાઉદીના તાબુક જોર્ડન પર્યટન સ્થળે હિમવર્ષા થઈ રહી છે. હિમવર્ષાથી જબલ અલ લાવજ, અલ દાહેર પર્વત ઢંકાઈ ગયા છે.