•  કેરળ સરકારે આ પહેલા CAAને રદ કરવાનો પ્રસ્તાવ પણ વિધાનસભામાં પસાર કર્યો હતો 
• CAA વિરુદ્ધ 60 અરજીઓ પહેલાથી જ સુપ્રીમ કોર્ટમાં દાખલ છે, આ અંગે 22 જાન્યુઆરીએ સુનાવણી

નવી દિલ્હીઃ કેરળ સરકાર નાગરિકતા સંશોધન કાયદા વિરુદ્ધ સુપ્રીમ કોર્ટ પહોંચી છે. સરકારનું તર્ક છે કે આ કાયદો બંધારણના અનુચ્છેદ 14,21 અને 25નું ઉલ્લંઘન કરે છે. CAA ધર્મનિરપેક્ષતા જેવા મૂળ સિદ્ધાંત વિરુદ્ધ છે. આ પહેલા કેરળ પહેલું એવું રાજ્ય હતું જેને આ કાયદાને રદ કરવા માટે 31 ડિસેમ્બરે વિધાનસભામાં પ્રસ્તાવ પસાર કર્યો હતો. CAA વિરુદ્ધ પહેલાથી જ 60 અરજી સુપ્રીમ કોર્ટમાં દાખલ કરાઈ છે. કોર્ટ આ અંગે 22 જાન્યુઆરીએ સુનાવણી કરશે. છેલ્લે એક સુનાવણીમાં સુપ્રીમ કોર્ટે આ કાયદા પર પ્રતિબંધ લગાવવાનો ઈન્કાર કરી દીધો હતો. કેન્દ્રીય ગૃહ મંત્રાલયે 10 જાન્યુઆરીના રોજ CAA અંગે માહિતી જાહેર કરી હતી.
બિહારમાં મુખ્યમંત્રી નીતિશ કુમાર પહેલા જ કહી ચુક્યા છે કે રાજ્યમાં CAA લાગુ નહીં કરવામાં આવે. ઘણા બિન-ભાજપ રાજ્યો CAA લાગુ કરવાનો ઈન્કાર કરી ચુક્યા છે. કેરળ સરકારે પાસપોર્ટ(ભારતમાં પ્રવેશ)સંશોધન નિયમ 2015 અને વિદેશી(સંશોદન)આદેશ 2015ની માન્યતાને પણ પડકારી છે. જેના હેઠળ પાકિસ્તાન, બાંગ્લાદેશ અને અફઘાનિસ્તાનથી બિન-મુસ્લિમ પ્રવાસીઓને નિયંત્રિત કરવાનું હતું જે 2015 પહેલા ભારતમાં શરણાર્થી તરીકે રહેતા હતા.

વિજયન સરકારની અરજીમાં આ અનુચ્છેદનો ઉલ્લેખ
અનુચ્છેદ 14માં સમાનતાના અધિકારનો ઉલ્લેખ છે. સાથે જ અનુચ્છેદ 21માં કહેવામાં આવ્યું છે કે કોઈ પણ વ્યક્તિને વિધિ દ્વારા સ્થાપિત પ્રક્રિયા ઉપરાંત તેના જીવન અને વ્યક્તિગત સ્વતંત્રતાના અધિકારથી વંચિત ન કરી શકાય. અનુચ્છેદ 25માં કહેવાયું છે કે તમામ વ્યક્તિઓને ધર્મ અપનાવવાની સ્વતંત્રતા છે.

ઉત્તરપ્રદેશે કેન્દ્રને 40 હજાર શરણાર્થીઓની યાદી મોકલી
આ પહેલા યુપીએ સોમવારે પાકિસ્તાન, અફઘાનિસ્તાન અને બાંગ્લાદેશથી આવેલા બિનમુસ્લિમ પ્રવાસીઓની માહિતી ગૃહમંત્રાલયને મોકલી દેવાઈ છે. તે આવું કરનારું પહેલું રાજ્ય બની ગયું છે. દેશમાં CAA લાગુ થયાની સાથે જ યોગી સરકારે રાજ્યભરના શરણાર્થીઓની યાદી બનાવવાની શરૂ કરી દીધી હતી. અત્યાર સુધી 19 જિલ્લાઓમાં રહેનારા 40 હજાર ગેરકાયદે પ્રવાસીઓને માહિતી એકઠી કરી ચુક્યા છે.