તમારા શહેરના લેટેસ્ટ સમાચાર અને ફ્રી ઈ-પેપર મેળવો

ડાઉનલોડ કરો

સ્ટોરી પોઈન્ટ:તો આજે હું કમોતે મર્યો હોત !

માવજી મહેશ્વરીએક મહિનો પહેલા
  • કૉપી લિંક
  • રિક્ષા ચલાવતો રમણીક એકાએક વેપારી થઈ ગયો. સૌને નવાઈ લાગી કે રમણીક પાસે દુકાન ખરીદવા નાણાં આવ્યા ક્યાંથી?

નાના એવા શહેરની મુખ્ય બજારના રસ્તા પર નાનકડો મંડપ. દૂરથી જ ખ્યાલ આવી જાય કે કોઈ દુકાનનું ઉદ્્ઘાટન હોવું જોઈએ અને હતું. તે દુકાનદારનાં સગાં-વહાલાં, મિત્રો વહેલાં આવી ગયાં હતાં. આજે જેની દુકાનનું ઉદ્્ઘાટન હતું તે રમણીક વારે વારે રસ્તા ઉપર જોઈ લેતો હતો. ગોર મહારાજે પૂજા વિધિ પૂરો કરી લીધેલો, પણ દુકાનનું વિધિવત્ ઉદ્્ઘાટન તો બાકી હતું. દરવાજાને આડી બાંધેલી લાલ રિબિન કાપવાની હતી, પણ રમણીક જેમની રાહ જોઈ રહ્યો હતો તે દુકાનના ઉદ્્ઘાટક બાબુકાકા હજુ આવ્યા ન હતા. એ દુકાન એટલે કોઈ મોટો શો-રૂમ નહીં, પાંચેક જણ ભેગા ઊભા હોય તો એકબીજા સાથે અથડાય એટલી જ જગ્યા. મોટી દુકાનો વચ્ચે ચેતન ઓટો પાર્ટ્સ જાણે જાજરમાન સ્ત્રીઓની વચ્ચે ઊભેલી સ્કૂલે જતી છોકરી. આખો દિવસ રિક્ષા ચલાવતો રમણીક એકાએક વેપારી થઈ ગયો. બધાને નવાઈ લાગી કે રમણીક પાસે દુકાન ખરીદવાનાં નાણાં આવ્યા ક્યાંથી? કેટલાકે તો તેને પૂછી પણ લીધું હતું. રમણીકે હાથ ઉપર કરીને કહી દીધું, ‘મારો રામ રાજી થયો છે.’ સૌ જાણે કે એમ કંઈ રાતોરાત રામ રાજી ન થાય. એકાદ જણાએ તો ચુકાદો આપી દીધો. નક્કી કોઈ પેસેન્જર રિક્ષામાં રૂપિયા ભરેલો થેલો ભૂલી ગયો હશે. કોઈકે એવુંય માની લીધેલું કે રમણીકને કોઈ જૂનું સોનું મળી ગયું લાગે છે, નહીંતર આવા મોંઘા વિસ્તારમાં એ દુકાન ક્યાંથી ખરીદી શકે? રમણીકે પોતાની દુકાનના ઉદ્્ઘાટનના કાર્ડ છપાવ્યા હતા. ઉદ્્ઘાટકનું નામ વાંચીને કેટલાકને રમણીક પાસે પૈસા આવ્યાનું રહસ્ય ઉકેલાતું જણાયું. બાબુકાકા એટલે લાખોપતિ જ નહીં, જરાક આગળનું વિશેષણ લગાડી શકાય એવા શ્રીમંત પરિવારના મોભી, પણ એ ન કોઈ સંસ્થાના ભૂતપૂર્વ કે વર્તમાન સભ્ય, ન તો ક્યારેય ચૂંટણીમાં ઊભા રહ્યા હતા, ન તો એમનું નામ દાનેશ્વરી તરીકે જાણીતું. એવા બાબુકાકા રમણીકની દુકાનના ઉદ્્ઘાટક? નવાઈ એટલા માટે પણ લાગે કે રમણીકની જ્ઞાતિ અને બાબુકાકાની જ્ઞાતિય જુદી. અરે! બાબુકાકા તો કદી રમણીકની રિક્ષામાંય નહીં બેઠા હોય. શા માટે બેસે? જ્યારે પેટ્રોલ આઠ રૂપિયે લિટર હતું ત્યારથી બાબુકાકાના ઘેર કાર હતી. બાબુકાકા અહીં કેમ? એ રહસ્ય રમણીક સિવાય પણ એક માણસ જાણતો હતો. એ રમણીકનો ભાઈબંધ અનવર. અનવરને જ ખબર હતી કે બાબુકાકા શા માટે રમણીકની દુકાનનું ઉદ્્ઘાટન કરવાના છે. તેણે જ નજરોનજર જોયું હતું. એ રામનવમીનો દિવસ હતો. રમણીકે એક દિવસ રિક્ષા બંધ રાખી હતી. તેને ભગવાન રામ તરફ અખૂટ શ્રદ્ધા. એટલે રામનવમીના દિવસે તે રિક્ષા ચાલુ જ કરતો નહીં. રમણીક અને અનવર પાન ખાવા માટે બસ સ્ટેન્ડ પાસે ઊભા હતા. બસ સ્ટેન્ડનો એ રસ્તો સાંજના સમયે ભીડ ભરેલો રહેતો. અનવરે બરાબર જોયું કે રમણીક રસ્તાની ધારે ઊભો હતો. પાછળથી એક બસ આવતી હતી અને અચાનક બીજી બસ વિરુદ્ધ દિશામાંથી નીકળી. એ વખતે કિંમતી વોકિંગ સ્ટિકને હાથમાં લઈને ચાલ્યો આવતો એક વૃદ્ધ બસનો અવાજ સાંભળી ઊભો રહ્યો, પણ અચાનક સ્વિમિંગ પૂલના સ્પ્રિંગ બોર્ડ ઉપર ઊભેલો કોઈ ઊંધી ડાઇવ મારતો હોય તેમ પાછળ તરફ નમ્યો. માર માર આવતી બસના ડ્રાઇવર પાસે કોઈ અવકાશ નહોતો, સિવાય કે એ વૃદ્ધને કચડી નાખે. ત્યાં ઊભેલા રમણીકે પળનોય વિલંબ કર્યા વગર દોટ મૂકી અને પાછળથી એ વૃદ્ધને પકડી લીધા અને રસ્તાથી નીચે ઉતારી દીધા. એંસી પાર કરી ગયેલા લાગતા એ વૃદ્ધને વિશ્વાસ બેસતો નહોતો કે તે પોતે જીવતા છે! તેમણે કહ્યું, ‘ભાઈ, તું ન હોત તો આજે હું કમોતે મર્યો હોત. મારી અવસ્થા છે. મને મરી જવાનું કોઈ દુઃખ ન થાત, પણ મારા દીકરાઓને કપાળે કાળી ટીલી લાગી જાત. બબ્બે શ્રીમંત દીકરાનો બાપ રસ્તા પર કચડાઈને મર્યો એ શરમમાંથી તેં મારા દીકરાઓને ઉગારી લીધા છે.’ પછી તો એ વૃદ્ધે અનવર અને રમણીક સાથે ચા પીતાં વાતો કરી. અનવરને એ વાતની ખબર બીજા દિવસે પડી કે એ રાતે એક કાર રમણીકને ઘેર ગઈ હતી. જેમાં આવેલા એ વૃદ્ધ અને એના બે દીકરાઓ બે કલાક રમણીકે ઢાળેલા ખાટલા ઉપર બેઠા હતા. રમણીકે જેમને બસ નીચે કચડાતા બચાવી લીધા એ વૃદ્ધ એટલે બાબુકાકા! પણ કોઈને શું ખબર કે અનવર બધું જાણે છે? ⬛mavji018@gmail.com

અન્ય સમાચારો પણ છે...