વુમન ઇન ન્યૂઝ:આસ્થા ખન્ના : ભારતની પહેલી સર્ટિફાઇડ ઇન્ટિમસી કોઓર્ડિનેટર

મીતા શાહ16 દિવસ પહેલા
  • કૉપી લિંક

ભારતમાં એન્ટરટેઇનમેન્ટ ક્ષેત્રમાં મોટા બદલાવ આવ્યા છે. પહેલાં ભારતમાં બોલ્ડ કે ઇન્ટિમેટ સીન બેધડક પડદા પર દર્શાવવામાં નહોતા આવતા અને અલગ અલગ સિમ્બોલથી વાતને રજૂ કરવામાં આવતી હતી. જોકે સમયની સાથે સાથે કાર્યશૈલીમાં પણ પરિવર્તન આવ્યું છે. ફિલ્મના પડદે અને ઓટીટી પ્લેટફોર્મ પર કોઇ શરમ કે સંકોચ વગર ઇન્ટિમેટ દૃશ્યો દર્શાવવામાં આવે છે. આ પરિસ્થિતિમાં ફિલ્મ પ્રોડક્શનમાં એક નવી પોસ્ટ ચર્ચામાં છે અને એ છે ઇન્ટિમસી કોઓર્ડિનેટરની. જેમ ફિલ્મોમાં એક્શન દૃશ્યોનાં શૂટિંગ માટે ફાઇટ માસ્ટરની અને ડાન્સ માટે કોરિયોગ્રાફરની નિમણૂક કરવામાં આવે છે એવી જ રીતે ઇન્ટિમેટ સીન સારી રીતે શૂટ કરવા માટે ઇન્ટિમસી કોઓર્ડિનેટરની મદદ લેવાય છે. ભારતમાં ગણીગાંઠી વ્યક્તિઓ ઇન્ટિમેટ કોર્ડિનેટર તરીકે કાર્યરત છે જેમાં સૌથી પહેલું નામ આવે છે આસ્થા ખન્નાનું. કોણ છે આસ્થા ખન્ના? : આસ્થા ખન્ના ભારતની પહેલી સર્ટિફાઇટ ઇન્ટિમસી કોઓર્ડિનેટર છે. તેણે અમેરિકાના લોસ એન્જલસ ખાતે આવેલા ઇન્ટિમસી પ્રોફેશનલ્સ અસોસિયેશનમાંથી ઇન્ટિમસી કોઓર્ડિનેટરનો 16 અઠવાડિયાનો કોર્સ કર્યો છે. આ પ્રોફેશનલ લાયકાત કેળવીને તેણે જે પ્રોફેશન વિશે કોઇ નહોતું જાળતું એની મદદથી ફિલ્મ ઇન્ડસ્ટ્રીમાં પોતાના માટે મજબૂત જગ્યા બનાવી લીધી. આસ્થાનું કામ થોડું જટિલ છે પણ અત્યારની પરિસ્થિતિમાં અત્યંત જરૂરી પણ છે. ખરેખર કામ શું હોય છે? : ઇન્ટિમેટ કોઓર્ડિનેટ સૌથી પહેલાં તો ડિરેક્ટર સાથે બેસીને ઇન્ટિમેટ સીનનાં વિઝન, થીમ અને મૂડને સમજે છે. જેવી રીતે કોરિયોગ્રાફ ડાન્સ તૈયાર છે તેવી જ રીતે ઇન્ટિમસી કોઓર્ડિનેટર ફિલ્મ કે સિરિઝના હોટ દૃશ્યો કોરિયોગ્રાફ કરે છે. આ દૃશ્ય કેવું હશે અને એ શૂટ કરતી વખતે કલાકારની દરેક મૂવમેન્ટ અને શારીરિક હિલચાલની તમામ વિગતો નક્કી કરવાની અને એની માહિતી એક્ટર્સને આપીને તેમને માનસિક રીતે સજજ કરવાની જવાબદારી ઇન્ટિમેટ કોઓર્ડિનેટરની હોય છે. આટલી તૈયારી કર્યા પછી પણ છેલ્લી ઘડીએ કલાકાર આ દૃશ્યો કરવાની પરવાનગી પાછી ખેંચી લે તો આ કટોકટીના સમયમાં શું કરી શકાય એ વિકલ્પ પર વિચાર કરવાની જવાબદારી ઇન્ટિમેટ કોઓર્ડિનેટરની હોય છે. અનેક ગેરમાન્યતા પોતાના કામ વિશે વાત કરતાં આસ્થાએ એક ઇન્ટરવ્યૂમાં જણાવ્યું છે કે ‘ઘણાં લોકો માને છે કે મારું કામ સેક્સ પોલીસ જેવું છે. કેટલાક લોકો મજાક કરે છે કે મને લોકોને જાતીય નિકટતા માણતાં જોવાનાં પૈસા મળે છે અથવા તો મારું કામ લોકોને નગ્ન જોવાનું છે. હકીકતમાં એવું નથી. હું લોકોને કહું છું કે મારા કરતા વધારે નગ્ન લોકો તો કોશ્ચ્યુમ ડિઝાઇનર જોતા હશે. એક એવી ધારણા છે કે ઇન્ટિમસી કોઓર્ડિનેટર સીનની કેમિસ્ટ્રીનો દાટ વાળી દેશે, પણ હકીકતમાં જો એક્ટર સીન સાથે વધારે કમ્ફર્ટેબલ હશે તો વધારે સારું કામ કરી શકશે અને મારું કામ તેમને કમ્ફ‌ર્ટેબલ બનાવવાનું જ છે.’ અત્યારની જરૂરિયાત ‘મી...ટૂ’ આંદોલન પછી મોટા મોટા સ્ટુડિયો અને ડિરેક્ટર્સ જાતીય શોષણના મુદ્દે વધારે સજાગ બન્યા છે. મોટાભાગના ફિલ્મમેકર્સ આવી સમસ્યાથી દૂર રહેવા ઇચ્છે છે. આ સંજોગોમાં તેમની મદદે ઇન્ટિમેટ કોઓર્ડિનેટર આવે છે. એ એક્ટર અને મેકર વચ્ચેની કડી બને છે અને ઇન્ટરનેશનલ નિયમો તેમન માપદંડને ધ્યાનમાં રાખીને ઇન્ટિમેટ સીનનાં શૂટિંગમાં મદદ કરે છે.

અન્ય સમાચારો પણ છે...