ગુલમહોર મોલમાં આગ, અફરાતફરી થતાં 500 લોકોને બહાર કાઢી મોલ ખાલી કરાયો

અમદાવાદ: સેટેલાઈટના ગુલમહોર મોલના ત્રીજા માળે આવેલા ફાસ્ટફૂડ સેન્ટરના કિચનમાં ગેસની પાઇપલાઈનમાં શુક્રવારે મોડી સાંજે આગ લાગતા ભારે અફરાતફરી મચી હતી. 500થી વધુ લોકોને મોલની બહાર ખસેડી દઈ આખો મોલ ખાલી કરી દેવાયો હતો.
બીજી તરફ સમયસર પહોંચેલી ફાયરબ્રિગેડની ટીમે આગનો ધુમાડો મોલમાં ફેલાય તે પહેલા જ તેની પર કાબૂ મેળવી લીધો હતો. પરંતુ જો આગ કાબૂમાં ન આવી હોત તો મોલમાં કરવામાં આવેલી આર્ટિફિશિયલ સજાવટને કારણે મોટી દુર્ઘટના બની હોત તેવું ફાયરના અધિકારીનું કહેવું છે. ફાયરબ્રિગેડના અભિપ્રાયને આધારે મોલમાં ઊભી કરેલી તમામ સજાવટ દૂર કરવામાં આવશે તેવું અધિકારી સૂત્રોનું કહેવું છે.