સારંગપુર દરવાજા પાસે ડમ્પરે લારીઓ અને પાંચ વાહનોને અડફેટે લીધા, 5 લોકોને ઈજા

અમદાવાદ: શહેરમાં દોડતા ડમ્પરો હવે બેફામ બની રહ્યાં છે. સારંગપુર દરવાજા પાસે ખાણીપીણીની બજારમાં મોડી રાતે બેફામ બનેલા ડમ્પર ચાલકે લારીઓ અને પાંચ વાહનોને અડફેટમાં લીધા હતા. જેમાં પાંચ વ્યક્તિઓનો ઈજાઓ પહોચતાં તમામને હોસ્પિટલમાં ખસેડવામાં આવ્યા હતાં. જેમાં એક યુવકની હાલત ગંભીર હોવાનું જાણવા મળ્યું છે.
સારંગપુરમાં રહેતો ધર્મેશ નામની યુવક રવિવારે મોડી રાતે સારંગપુર દરવાજા પાસે ખાણીપીણીની બજારમાં તેના મિત્ર પ્રિયાંક, કૃણાલ, અશ્વિન અને ઉમેશ સાથે આમલેટ ખાવા લારી પર ઉભા હતા. ત્યારે બેફામસ્પીડે એક ડમ્પર આવ્યું હતું અને ખાણીપીણી બજારમાં ઘુસ્યું હતું.  બેફામ બનેલા ડમ્પર ચાલકે  બજારની લારીઓ, ત્રણ એક્ટિવા, બે રીક્ષા સહિતના વાહનોને અડફેટમાં લીધા હતા. આમલેટની લારીને અડફેટે લેતા ત્યાં ઉભેલા ધર્મેશ અને તેના મિત્રોને ઇજા થઇ હતી. તેઓને સારવાર માટે સિવિલ હોસ્પિટલમાં ખસેડવામાં આવ્યા હતા. ઇ ટ્રાફિક પોલીસે ગુનો નોંધી ડમ્પરચાલકની ધરપકડની તજવીજ શરૂ કરી છે.