ધરપકડ:ચેમ્બુરમાં ભાડાનું ઘર લઈ નોટ છાપનારો ઝડપાઈ ગયો

કોરોનાને કારણે કામધંધો બંધ થતાં અને માથ મોટું દેવું થતાં એક શખસે ચેમ્બુરમાં ભાડાનું ઘર લઈને તેમાં ચલણી નોટો છાપીને વટાવવાનું શરૂ કર્યું હતું. જોકે ક્રાઈમ બ્રાન્ચને માહિતી મળતાં આ કૌભાંડનો પર્દાફાશ કરીને તેની ધરપકડ કરવામાં આવી છે. આરોપી મહંમદ ફકિયાન અય્યુબ ખાન (35) ચેમ્બુરનો જ રહેવાસી છે. આરોપી નોટ વટાવવા આવવાનો છે એવી માહિતી મળતાં ક્રાઈમ બ્રાન્ચની એન્ટોપ હિલ શાખાના પ્રભારી પીઆઈ નિનાદ સાવંત અને ટીમ દ્વારા મંગળવારે રાત્રે છટકું ગોઠવીને આરોપીને ઝડપી લેવાયો હતો.

આરોપી પાસેથી રૂ. 500, રૂ. 200, રૂ. 100, રૂ. 50ની કુલ 657 મળી રૂ. 55,450ની ચલણી નોટો મળી આવી હતી. આ પછી ઊલટતપાસ લેતાં ઘરમાં આ નોટો છાપતો હોવાનું કબૂલ કર્યું હતું, જેને આધારે તેના ઘરમાં દરોડા પાડતાં રૂ. 500, રૂ. 200, રૂ. 100 અને રૂ. 50ની વધુ 3015 મળી રૂ. 3,43,100 મૂલ્યની નોટો મળી આવી હતી.

યુટયુબ પરથી નોટ બનાવવાનું શીખ્યો
આરોપીએ કબૂલ કર્યું કે કોરોનાને લીધે કામધંધો બંધ થતાં માથે દેવું વધી ગયું હતું. આથી પૈસા કમાવાના વિકલ્પો શોધતો હતો. તે સમયે તેણે નોટ બનાવવાનું વિચાર્યું હતું. આ માટે યુટ્યુબ અને અન્ય વેબસાઈટ પરથી નકલી ભારતીય ચલણી નોટો કઈ રીતે બનાવવી તે પદ્ધતિ શીખી હતી. આ પછી બજારમાંથી છપાઈનું સાહિત્ય લઈને આવ્યો હતો.