બેદરકારી:પાલિકા સહઆયુક્ત પાણી સમજી સેનિટાઈઝર પી ગયા

મુંબઈ મહાપાલિકાના સહઆયુક્ત રમેશ પવાર બજેટની રજૂઆતના સમયે પાણી સમજીને ભૂલથી સેનિટાઈઝર પી ગયા હતા. તેમના ધ્યાનમાં આ વાત આવી હતી. તેમની તબિયત બરાબર છે. એ સમયે તેમને તરત પાણીની બાટલી આપવામાં આવી હતી.

શિક્ષણ સમિતિ અધ્યક્ષ સંધ્યા દોશી સભાગૃહમાં આવ્યા બાદ મુંબઈ મહાપાલિકાનું શિક્ષણ વિભાગનું 2021-22નું વાર્ષિક બજેટ શિક્ષણ સમિતિ અધ્યક્ષને સુપ્રત કરવામાં આવ્યું. આ બજેટ વાંચવા રમેશ પવાર ખુરસી પર બેઠા. પણ એ પહેલાં તેમને પાણી પીવું હતું. સામે એક સેનિટાઈઝરની બોટલ હતી અને એક પાણીની બોટલ હતી. અજાણતા જ તેઓ પાણીની બોટલ છોડીને સેનિટાઈઝરની બોટલ લીધી અને પી ગયા.

મહાપાલિકાનું શિક્ષણ બજેટ રજૂ થતું હતું એ સમયે સહઆયુક્ત રમેશ પવાર બજેટ વાંચવા માટે આવ્યા હતા કારણ કે અતિરિક્ત આયુક્ત આશુતોષ સલીલ તબિયત સારી ન હોવાથી ગેરહાજર હતા. તેથી અચાનક બજેટ રજૂ કરવાની જવાબદારી રમશ પવારના માથે આવી હતી.

બજેટ રજૂ કરવા પહેલાં તેમને પાણી પીવું હતું. પણ તેમણે ભૂૂલથી સેનિટાઈઝરની બોટલ હાથમાં લીધી અને મોંઢે લગાડી હતી. પોતે સેનિટાઈઝર પીધું છે એ વાત તરત ધ્યાનમાં આવતા તેઓ તરત બહાર ગયા હતા અને મોંઢામાં ગયેલું સેનિટાઈઝર થૂંકી દીધું હતું.થોડા સમય પછી તેઓ સભાગૃહમાં પાછા આવ્યા હતા અને નિયોજીત કાર્યક્રમ પૂરો કર્યો હતો. તેમની કોઈ તકલીફ નથી એમ જણાવવામાં આવ્યું હતું.