ઝુંબેશ:મુંબઈના રસ્તાઓને ભિખારી મુક્ત કરવા પોલીસની ઝુંબેશ

મુંબઈ પોલીસ હવે મુંબઈના ભિખારીઓ વિરુદ્ધ કાર્યવાહી કરવાની તૈયારીમાં છે. મુંબઈ પોલીસ તરફથી ભિક્ષુક પકડો ઝુંબેશ અમલમાં મૂકવામાં આવશે. એના અંતર્ગત રસ્તા પરના ભિખારીઓને પકડીને તેમને ચેંબુરના ભિક્ષુક સ્વીકાર કેન્દ્રમાં રાખવામાં આવશે. તેમની કોવિડ ટેસ્ટ પણ કરવામાં આવશે.

ભિક્ષુક પકડો ઝુંબેશ અંતર્ગત મુંબઈના રસ્તાઓ પર ભીખ માગતા લોકોને મુંબઈ પોલીસ તાબામાં લેશે. ફેબ્રુઆરીથી આ ઝુંબેશની શરૂઆત કરવાનો પોલીસ સહઆયુક્ત વિશ્વાસ નાંગરે પાટીલે આદેશ આપ્યો છે. તેમની કોવિડ ટેસ્ટ કરીને ચેંબુરના ભિક્ષુક સ્વીકાર ગૃહમાં મોકલવામાં આવશે. ભીખ માગવી કાયદેસર ગુનો છે. એનું પોલીસ હવે સખતાઈથી પાલન કરશે. મુંબઈમાં દિવસે દિવસે ભિખારીઓની સંખ્યા વધી રહી છે. એમાં આ ખરાબ પરિસ્થિતિને પોતાનો વ્યવસાય બનાવનારાઓની સંખ્યા વધારે છે. તેથી પોલીસે આ ઝુંબેશની શરૂઆત કરી છે. ભીખ માગવી એ એટલી ખરાબ અવસ્થા છે કે આપણા દુશ્મન પર પણ આવો સમય ન આવે એમ બોલાય છે.