સુવિધા:મુંબઈમાં આગામી 20 વર્ષમાં 487 કિમી લાંબા મેટ્રો રૂટની જરૂર

મુંબઈ6 મહિનો પહેલા
  • કૉપી લિંક
  • MMRDAએ મુંબઈ અને MMRમાં પરિવહન વ્યવસ્થાનો અભ્યાસ કર્યો

મુંબઈ મહાનગર પ્રદેશની (એમએમઆર) સાર્વજનિક પરિવહન વ્યવસ્થા મજબૂત કરવા માટે આગામી 20 વર્ષમાં (2041 સુધી) 487 કિલોમીટર લાંબુ મેટ્રોનું અને 232 કિલોમીટર લાંબુ ઉપનગરીય રેલવેનું જાળું વિકસિત કરવાની જરૂર હોવાની ભલામણ પરિવહન અભ્યાસ 2માં કરવામાં આવી છે. મેટ્રો અને ઉપનગરીય રેલવે સહિત 533 કિલોમીટર લાંબો સ્વતંત્ર બસ રૂટ, 1264 કિલોમીટર લાંબા રસ્તા પણ વિકસિત કરવા જરૂરી હોવાનું આ રૂપરેખામાં જણાવવામાં આવ્યું છે.

નિયોજન પ્રાધિકરણ તરીકે એમએમઆરડીએએ ભવિષ્યમાં મુંબઈ અને એમએમઆરમાં પરિવહન વ્યવસ્થા મજબૂત કરવા માટે 2008 થી 2021 સુધીનો અભ્યાસ કર્યો છે. પરિવહન અભ્યાસ નામથી આ અભ્યાસ કરીને એ અનુસાર રૂપરેખા તૈયાર કરવામાં આવી છે. આ રૂપરેખા અંતર્ગત જે ભલામણો કરવામાં આવી એની અમલબજાવણી કરીને મેટ્રો, સીલિન્ક અને અન્ય પ્રકલ્પ પાટે ચઢાવવામાં આવ્યા છે. જોકે એ પછી પણ મુંબઈ-એમએમઆરમાં પરિવહન વ્યવસ્થા મજબૂત થઈ નથી. લોકસંખ્યા ઝડપથી વધી હોવાથી ઉપલબ્ધ ખાનગી, સાર્વજનિક પરિવહન વ્યવસ્થા ઓછી પડવા માંડી છે.

તેથી આગામી 20 વર્ષના પરિવહન અભ્યાસની જરૂરી વર્તાઈ અને એ અનુસાર એમએમઆરડીએએ 2021 થી 2041 સુધીનો પરિવહન અભ્યાસ 2 પૂરો કર્યો છે. આ અભ્યાસનું પ્રકાશન મુખ્યમંત્રી ઉદ્ધવ ઠાકરેના હસ્તે કરવામાં આવ્યું હતું. છેલ્લા થોડા વર્ષોમાં એમએમઆરની સાર્વજનિક પરિવહનનો વપરાશની ટકાવારી 78 થી 65 ટકા થઈ છે એમ અભ્યાસમાં જણાયું છે. ખાનગી ટુવ્હીલર અને ફોરવ્હીલર તથા ટેક્સી-રિક્ષામાં વધારો થયો છે.

આ ચિંતાની બાબત હોવાનું જણાવતા એમએમઆરડીએએ હવે સાર્વજનિક પરિવહનની ઓછી થયેલી ટકાવારી વધારવા માટે આ અભ્યાસની ભલામણોની અમલબજાવણી કરીને સાર્વજનિક પરિવહનને મજબૂત કરવાનો નિર્ણય લીધો છે. આ અભ્યાસમાં અનેક મહત્ત્વની ભલામણો કરવામાં આવી છે. આ ભલામણોનું કૃતિ રૂપરેખામાં રૂપાંતર કરીને પરિવહન સુવિધા પ્રકલ્પ વિકસિત કરવામાં આવશે.

4 લાખ કરોડ રૂપિયાની જરૂર
પરિવહન અભ્યાસ 2 અંતર્ગત તૈયાર કરવામાં આવેલી કૃતિ રૂપરેખાના માધ્યમથી આ તમામ પ્રકલ્પ પૂરા કરવાનું પ્રાધિકરણના મહાનગર આયુક્ત એસ.વી.શ્રીનિવાસે જણાવ્યું હતું. એના માટે 4 લાખ કરોડ રૂપિયાના ભંડોળની જરૂર પડશે. મુંબઈ મહાપાલિકા, બેસ્ટ, રેલવે, એમએસઆરડીસી અને અન્ય સરકારી યંત્રણાની મદદથી આ પ્રકલ્પ ઊભા કરવામાં આવશે એમ તેમણે સ્પષ્ટ કર્યું હતું.

આગામી 20 વર્ષની જરૂર
487 કિલોમીટર લાંબો મેટ્રો માર્ગ, 232 કિલોમીટર લાંબો ઉપનગરીય રેલવે માર્ગ, 533 કિલોમીટર લાંબો બસ માર્ગ/બીઆરટીએસ, 1264 કિલોમીટર લાંબા રસ્તા (અત્યારના રસ્તાઓ સહિત), 4 આંતરરાજ્ય બસ ડેપો, 13 ઈન્ટરનલ બસ ડેપો, 5 શહેરોમાં રેલ ટર્મિનલ, 5 મોટા અને 14 નાના ટ્રક ટર્મિનલ

અન્ય સમાચારો પણ છે...