કોરોના વોરિયર્સ:દર્દીઓની સેવામાં સંક્રમિત ડોક્ટરે કોરોનાને માત આપી, ભવ્ય આવકાર

ડૉક્ટરધર્મ નિભાવતાં નિભાવતાં કોરોનાવાઇરસની લપેટમાં આવી ગયેલા ઘાટકોપરના ડૉ. નવીન ચાંદ્રા સોમવારે સાંજે સાજા થઈને ઘરે પાછા આવી ગયા, તેઓ જ્યાં રહે છે એ જગડુશાનગરના રહેવાસીઓએ તેમને ભવ્ય આવકાર આપ્યો હતો. ડૉ. નવીન ચાંદ્રા બીજી મે સુધી પોતાના ક્લિનિક્સમાં પેશન્ટોને તપાસી રહ્યા હતા. કોરોનાવાઇરસને માત આપીને તેઓ માત્ર ૧૦ દિવસની અંદર પાછા આવી ગયા છે. અગાઉ હૉસ્પિટલમાંથી ડૉ. ચાંદ્રાએ વિડિયો સંદેશ આપ્યો હતો કે મારા પેશન્ટોની સેવા કરવા હું ટૂંક સમયમાં જ પાછો આવી જઈશ. આ વિડિયોમાં પણ કેન્દ્રસ્થાને તેમના પેશન્ટ જ હતા.લૉકડાઉનમાં જ્યારે મોટા ભાગનાં ક્લિનિકો બંધ છે ત્યારે પોતાની ત્રણેય ડિસ્પેન્સરી ખુલ્લી રાખીને છેક શનિવાર, બીજી મે સુધી ડૉ. ચાંદ્રા ડૉક્ટરધર્મ નિભાવી રહ્યા હતા.