ક્રાઇમ:કલ્યાણમાં પોલીસ પર હુમલો કરીને ટોળું ચેઈનચોરને લઈ ગયું

થાણે જિલ્લામાં કલ્યાણ ખાતે આંબિવલી શહેરમાં ઈરાણી વાડી નામે વસતિમાં ચેઈનચોરટાને છોડાવવા માટે ટોળાએ પોલીસ પર હુમલો કર્યો હતો, જેમાં ત્રણ પોલીસ ઘાયલ થયા હતા. મીરા ભાયંદર વસઈ વિરાર કમિશનરેટની ક્રાઈમ બ્રાન્ચની ટીમને આંબિવલીના ઈરાણીપાડામાં રીઢા ચેઈનચોરટાને પકડી પાડયો હતો. આ ટીમ બે પોલીસ જીપમાં પાછી આવતી હતી. જીપ રેલવે ક્રોસિંગ ખાતે ઊભી રહી તે સમયે મહિલાઓ સહિતના સ્થાનિક ટોળાએ અચાનક પથ્થરો, લોખંડના સળિયા, લાકડીઓથી હુમલો કર્યો હતો. આ પછી ચોરટાને જીપમાંથી બહાર ખેંચી કાઢ્યો હતો અને તેને લઈને નાસી ગયા હતા.

પોલીસની એક જીપ હેમખેમ ત્યાંથી નીકળી ગઈ હતી.હુમલામાં ત્રણ પોલીસ ઘાયલ થયા હતા જેમને નજીકની હોસ્પિટલમાં દાખલ કરવામાં આવ્યા હતા. ખડકપાડા પોલીસ આ અંગે વધુ તપાસ કરી રહી છે. ઈરાણી વાડી વિસ્તારમાં ઈરાણી ટોળકીની વસતિ (કબિલા) છે, જ્યાં અનેક ગુનેગારો આશ્રય લઈ રહ્યા છે એવું અનેક પોલીસે પાડેલા દરોડામાં બહાર આવ્યું છે. ખાસ કરીને આ વસતિમાં અગાઉ પણ પોલીસો પર 8થી 9 વર હુમલા થયા હતા.