કોરોનાવાઈરસ:14 મેથી પરમિટ હોય તેમને દારૂની હોમ ડિલિવરી કરવાની છુટ અપાશે

મહારાષ્ટ્ર સરકારે દારૂની હોમ ડિલિવરીની 14 મેથી છૂટ આપી છે. આ યોજના ફક્ત તે લોકો માટે લાગુ પડશે જેમની પાસે દારૂ પીવાની પરમિટ છે. સરકારે મંગળવારે દારૂ હોમ ડિલિવરી કરવા માટે માર્ગદર્શિકા જારી કરી હતી. જોકે કેટલીક શરતો રખાઈ છે. વાઇન શોપ દ્વારા લોકોને ઘરોમાં દારૂ પહોંચાડવા માટે ડિલિવરી બોયની નિયુક્ત કરવાનું ફરજિયાત રહેશે, આ કર્મચારીઓની સ્વાસ્થ્ય તપાસ કરવામાં આવશે. ડિલિવરી બોય કોવિડ- 19નો વાહક નહીં હોય તેની ખાતરી કરવા માટે સ્ટેટ એક્સાઈઝ તેમને ઓળખપત્ર આપશે.
સેનિટાઇઝરનો ફરજિયાત ઉપયોગ જેવી કેટલીક શરતો નક્કી કરી
જોકે કેટલા વાઇન શોપ આ શરતોનું કેટલું પાલવ કરે છે તે જોવાનું રહેશે. સરકારે કહ્યું છે કે શરાબ સેવાની પરમિટ ઓનલાઈન આપવાનો પણ વિચાર ચાલુ છે, કારણ કે તે સ્વીકારે છે કે બહુ ઓછા ગ્રાહકો પાસે દારૂની પરમિટ હોઈ શકે છે.મહારાષ્ટ્ર સરકારે એક નોંધનીય પગલાંમાં ભારતીય બનાવટ વિદેશી દારૂ, બિયર, હળવાં પ્રકારનાં લિકર અને વાઇનની હોમ ડિલિવરીને મંજૂરી આપી છે. દેશવ્યાપી લોકડાઉનના ત્રીજા તબક્કામાં દારૂની દુકાનો ખોલવાની છૂટ હોવા છતાં સામાજિક અંતરનાં ધારાધોરણોનું ઉલ્લંઘન થતાં મુંબઈ જેવાં ઘણાં શહેરોમાં વાઇન શોપ બંધ કરવાની ફરજ પડી હતી. 11 મેના હુકમ મુજબ સરકારે દારૂના વિતરણ માટે તહેનાત વ્યક્તિઓ દ્વારા માસ્ક અને હેન્ડ સેનિટાઇઝરનો ફરજિયાત ઉપયોગ જેવી કેટલીક શરતો નક્કી કરી છે. તદુપરાંત દારૂનું વેચાણ અને હોમ ડિલિવરી ચોક્કસ દિવસો અને ખમુક સમય પર જ થઇ શકશે. પરમિટ ધારક સંબંધિત દારૂના વેચાણ માટે ઓનલાઈન ઓર્ડર આપે પછી જ હોમ ડિલિવરીની મંજૂરી આપવામાં આવશે. રાજ્યમાં લોકડાઉન યથાવત રહેશે ત્યાં સુધી આ હુકમ લાગુ રહેશે. જોકે મહારાષ્ટ્ર સરકારે સ્પષ્ટતા કરી છે કે આ હુકમમાં કોઈ પણ સમયે ફેરફાર શક્ય છે અથવા ફરીથી નવો આદેશ બહાર પાડવામાં આવી શકે છે.