દુર્ઘટના:સાયન પ્રતિક્ષાનગરમાં આગ, 15થી વધુને ઉગારાયા

મુંબઇના સાયન-ઈસ્ટમાં પ્રતિક્ષાનગર ખાતેની એક ગ્રાઉન્ડ પ્લસ ચાર માળની ઈમારતમાં સોમવારે સવારે આગ લાગી હતી. ફાયર વિભાગ દ્વારા ઓછામાં ઓછા 15 થી 20 લોકોને સુરક્ષિત રીતે બચાવવામાં આવ્યા હતા. મહાપાલિકાના ડિઝાસ્ટર સેલના જણાવ્યા અુનસાર સાયન-કોલીવાડા ખાતેના બેસ્ટ બસ સ્ટોપ પાસે, પ્રતિક્ષા નગરમાં માલા ગાર્ડન સામે ચાર માળની ઈમારતમાં સવારે 5:35ની આસપાસ આગ લાગવાની ઘટના બની હતી. આ આગની જાણ થતાં જ ફાયર ફાઇટરની ટીમ ઘટનાસ્થળે પહોંચી ગઈ હતી અને ઉપરોક્ત ઇમારતમાં રહેતા 15થી 20 લોકોને ઉગારી લીધા હતા. સોમવારે સવારે 6:32 વાગ્યે આગ કાબૂમાં લેવામાં આવી હતી. આ ઘટનામાં કોઈ ઈજાઓ નોંધાઈ નથી. પ્રથમિક તપાસ મુજબ આગ પાછળનું કારણ જાણી શકાયું નથી.