297.80 કરોડની છેતરપિંડી:બેન્કો સાથે કરોડોની ચીટિંગમાં 24 સામે ચાર્જશીટ

ઈન્ડિયન ઓવરસીઝ બેન્ક સહિત વિવિધ નાણાકીય સંસ્થાઓ અને બેન્કો સાથે રૂ. 297.80 કરોડની છેતરપિંડી અંગે સીબીઆઈ દ્વારા મુંબઈની વિશેષ કોર્ટમાં મંગળવારે મુંબઈ સ્થિત ખાનગી કંપનીના ડાયરેક્ટર, ચાર્ટર્ડ અકાઉન્ટન્ટ, બેન્કના તત્કાલીન અધિકારી, સહયોગી કંપની અને પેઢીના ડાયરેક્ટરો અને પ્રોપ્રાઈટરો સહિત 24 જણ સામે ચાર્જશીટ દાખલ કરી હતી.

નકલી અને ચેડાં કરેલા ઈન્વોઈસીસ અને લેટર ઓફ ક્રેડિટ સુપરત કરીને આરોપીઓએ ભંડોળની ઉચાપત કરી હતી. ઉપરાંત વિવિધ બેન્કો અને નાણાકીય સંસ્થાઓ પાસેથી ગેરકાનૂની માર્ગે ક્રેડિટ લિમિટ્સ પણ લીધી હતી. એકટલી આઈઓબીની મુંબઈ શાખાએ રૂ. 292.20 કરોડની ધિરાણ સુવિધાઓનું વિતરણ કર્યું હતું. આરોપીઓએ છેતરેલી અન્ય બેન્કમાં એસબીટી, દેના બેન્ક, કોર્પોરેશન બેન્ક, આઈડીબીઆઈ બેન્ક, એસબીઆઈ, એક્ઝિમ બેન્કનો સમાવેશ થતો હતો.