ધરપકડ:7 મલ્ટીપ્લેક્સમાં બોમ્બ, ટ્વીટ કરનારો પકડાયો

મેડમ ચીફ મિનિસ્ટર ફિલ્મ લાગી છે તે મુંબઈ તથા આસપાસનાં શહેરોનાં સાત મલ્ટીપ્લેક્સમાં બોમ્બ મુકાયા છે એવી ખોટી માહિતી આપીને પોલીસની ભાગદોડ મચાવનારા ટીનેજરની હરિયાણાથી ધરપકડ કરવામાં આવી છે. હરિયાણાનો બનવારી સિંહે (19) મોજમસ્તી ખાતર ખોટી માહિતી આપી હોવાનું પ્રાથમિક તપાસમાં બહાર આવ્યું છે.

22 જાન્યુઆરીના રોજ આરોપીએ 22 જાન્યુઆરીના રોજ બોમ્બ મૂકવામાં આવ્યા છે એવી માહિતી આપીને મુંબઈ પોલીસ અને અમુક પોલીસ અધિકારીઓને ટેગ પણ કર્યા હતા. તેણે કમાંડો સિંહ નામે ટ્વિટર હેન્ડલ પરથી પોસટ મૂકી હતી, જેમાં મલાડ, અંધેરી અને વસઈમાં મેડમ ચીફ મિનિસ્ટર ફિલ્મ લાગી છે તેવાં સાત મલ્ટીપ્લેક્સમાં બોમ્બ મૂકવામાં આવ્યા છે એવી માહિતી આપી હતી.

આ માહિતી પછી પોલીસે મલ્ટીપ્લેક્સો બંધ કરાવીને સઘન તપાસ કરી હતી. જોકે આ માહિતી અફવા ફેલાવવા માટે આપી હોવાનું જણાયું હતું. આરોપીએ તે પછી ટ્વીટ કરી નાખ્યું હતું. સાઈબર પોલીસે આરોપીને શોધવા માટે સઘન તપાસ કરી હતી, જેમાં આરોપી હરિયાણાનો હોવાનું બહાર આવ્યું હતું, જેને લઈ તેની ધરપકડ કરવામાં આવી છે, એમ સાઈબર સેલના ડીસીપી રશ્મી કરંદીકરે જણાવ્યું હતું.આરોપીએ જે મોબાઈલ ફોનનો અફવા ફેલાવવા માટે ઉપયોગ કર્યો હતો તે પોલીસે જપ્ત કર્યો છે. આરોપી સામે ભારતીય ફોજદારી સંહિતા અને ઈન્ફોર્મેશન ટેકનોલોજી એક્ટની સુસંગત કલમો હેઠળ ગુનો દાખલ કરવામાં આવ્યો છે.