વાતાવરણ:શહેરમાં લઘુતમ તાપમાન ઓછું થવા સાથે હવાની ગુણવત્તા બગડી

મુંબઈ લઘુતમ તાપમાન આંશિક ઓછું થવા સાથે હવાની ગુણવત્તા બગડી છે. આગામી બે દિવસમાં તાપમાનમાં વધુ ઘટાડો થશે એમ ઈન્ડિયન મીટિરિયોલોજિકલ ડિપાર્ટમેન્ટે જણાવ્યું હતું. સોમવારે સવારે મુંબઈના શહેરી અને ઉપનગરીય વિસ્તારોમાં લઘુતમ તાપમાન ઓછું થઈને હવાની ગુણવત્તા બગડી હોવાનું નોંધાયું હતું.સોમવારે સાંતાક્રુઝમાં લઘુતમ તાપમાન 16 ડિ.સે. નોંધાયું હતું, જે રવિવાર કરતાં 4.4 ડિ.સે. ઓછું હતું અને સામાન્ય કરતાં 1.4 ડિગ્રી ઓછું હતું.

કોલાબામાં પણ લઘુતમ તાપમાન 21.6 ડિગ્રી સુધી નીચે આવ્યું હતું, જે રવિવારે 18.8 ડિગ્રી હતું અને સામાન્ય કરતાં 1 ડિગ્રી ઘટ્યું હતું. આ સાથે સોમવારે દિવસ દરમિયાન ઠંડો ઠંડો પવન ફૂંકાયો હતો, જેને લીધે વાતાવરણમાં દિવસભર ઠંડક પ્રસરેલી રહી હતી. પશ્ચિમી અવરોધક પટ્ટા સાથે ઉત્તરીય ભાગમાંથી ઉત્તરથી વાયવ્યના ઠંડા પવનને લીધે મોટે ભાગે તાપમાનમાં ઘટાડો નોંધાયો હતો, એમ આઈએમડીના વેસ્ટર્ન રિજનના ડેપ્યુટી ડાયરેક્ટર જનરલ કે એસ હોસાળીકરે જણાવ્યું હતું.