ધરપકડ:આફ્રિકન મહિલા રૂ. 9 કરોડના હેરોઈન સાથે એરપોર્ટ પર પકડાઈ

દેશભરમાં માદક પદાર્થ સામે વિવિધ તપાસકારી એજન્સીઓ દ્વારા આક્રમક રીતે કાર્યવાહી કરવામાં આવી રહી હોવા છતાં ડ્રગની દાણચોરી ઓછંુ થવાનું નામ લેતી નથી. ગુરુવારે વહેલી સવારે મુંબઈ એરપોર્ટ પરથી એક આફ્રિકન મહિલા રૂ. 9 કરોડના હેરોઈન સાથે પકડાઈ હતી. તેણે ટ્રોલી બેગમાં પોલાણ બનાવીને હેરોઈન ભરેલાં પેકેટ છુપાવ્યાં હતાં. નાર્કોટિકસ કંટ્રોલ બ્યુરો (એનસીબી)ના મુંબઈ ઝોનલ ડાયરેક્ટર સમીર વાનખેડેની આગેવાની હેઠળની ટીમે વિશ્વસનીય માહિતીને આધારે ગુરુવારે વહેલી સવારે મુંબઈ એરપોર્ટ પર છટકું ગોઠવ્યું હતું.

તે સમયે કતાર એરવેઝ ફ્લાઈટ નં. ક્યુઆર 0556માં જોહાનિસબર્ગ - દોહા - મુંબઈ પ્રવાસ કરતી દક્ષિણ આફ્રિકન મહિલા ખેનિસિલ પ્રોમિસ ખેલિશવાયોને શંકા પરથી આંતરવામાં આવી હતી.તેની પાસેની રાખોડી રંગની ટ્રોલી બેગની સઘન તલાશી લેતાં તેમાં એક પોલાણ બનાવ્યું હતું, જેમાં હેરોઈનનાં બે પેકેટ છુપાવવામાં આવ્યાં હતાં. કુલ 3 પેકેટમાં 2.960 કિલો હેરોઈન મળી આવ્યું હતું, જેનું આંતરરાષ્ટ્રીય બજારમાં મૂલ્ય રૂ. 9 કરોડથી વધુ જાય છે. ઉપરાંત મહિલા પાસેથી 10,000 સાઉથ આફ્રિકન ચલણી નોેટો રેન્ડ મળી આવી હતી. આ સંબંધે તેની ધરપકડ કરવામાં આવી હતી.