ગોવંડી હત્યાકેસ:આરોપી પાંચ વર્ષે સુરતથી ઝડપાયો

ગોવંડીમાં હત્યા કરીને ભાગી ગયેલો 34 વર્ષનો આરોપી પાંચ વર્ષ પછી આખરે સુરતથી ઝડપાઈ ગયો છે. તે મૂળ ગોવંડી બૈંગનવાડીનો રહેવાસી છે. નંદકુમાર ગોપાળેની આગેવાની હેઠળની ક્રાઈમ બ્રાન્ચ યુનિટ-9ની ટીમે આરોપીને મંગળવારે સુરતથી પકડી પાડ્યો હતો.

8 ઓગસ્ટ, 2016ના રોજ બૈેગનવાડીમાં લાઈટ ચોરી સામે વાંધો ઉઠાવતાં બકરઅલી શેખ (20)ની ઈંટથી મારઝૂડ કરીને આ ખંજર ભોંકીને ક્રૂરતાથી હત્યા કરી હતી. આ કેસમાં પોલીસે ત્રણ આરોપીની ધરપકડ કરી હતી, જ્યારે એક ફરાર હતો. ત્રણમાં બે આરોપીને પુરાવાને અભાવે કોર્ટે છોડી મૂક્યા હતા, જ્યારે એક આરોપીને 2019માં આજીવન કેદની સજા આપી હતી.

જોકે એક આરોપી ગુનો થયો ત્યારથી ફરાર થઈ ગયો હતો. તે સુરતમાં ઓળખ છુપાવીને રહે છે એવ ખબરીએ આપેલી માહિતીને આધારે ગોપલેની આગેવાનીમાં વિશેષ ટીમે સુરત જઈને તેને ઝડપી લીધો હતો. તેને રિમાંડ પર લઈને હવે વધુ તપાસ કરવામાં આવી રહી છે.