આપઘાત:સી-લિન્ક પાસે ઝારખંડના યુવકે ઝાડ પર ગળેફાંસો ખાઈ લીધો

બાંદરા-વરલી સીલિન્ક પાસેના રસ્તાની કોરે આવેલા ઝાડ પર એક યુવાને ગળે ફાંસો ખાઈને આત્મહત્યા કર્યાની ઘટના પ્રકાશમાં આવી હતી. મૃતક શિવશંકર યાદવ (22) મૂળ ઝારખંડનો રહેવાસી છે. આ પ્રકરણે વરલી પોલીસ સ્ટેશનમાં અપમૃત્યુની નોંધ કરવામાં આવી છે. શિવશંકર વરલીના મદ્રાસવાડી પરિસરમાં રહેતો હતો. મલબાર હિલ ખાતે રહેતા ભાઈને મળ્યા બાદ એ વરલીના કેટલાક મિત્રોને મળ્યો હતો. મધરાત પછી શિવશંકરે હિલ રોડ પર એક ઝાડ પર ગળે ફાંસો ખાધો હતો. સવારના એક વર્તમાનપત્ર વિક્રેતાએ એને ઝાડ પર લટકતો જોયો.

આ બાબતની માહિતી એણે પોલીસને આપી ત્યારે વરલી પોલીસ ઘટનાસ્થળે પહોંચી હતી. પોલીસને શિવશંકરનો મૃતદેહ પોસ્ટમોર્ટમ માટે હોસ્પિટલમાં મોકલ્યો હતો.થોડા મહિના પહેલાં એણે ઝારખંડમાં સગીર છોકરી સાથે લગ્ન કર્યા હતા. એને લઈને શિવશંકર મુંબઈ આવ્યો હતો. એ પછી સગીરાના ઘરનાઓએ શિવશંકર વિરુદ્ધ ઝારખંડમાં પોલીસ ફરિયાદ નોંધાવી હતી. આ ગુના હેઠળ શિવશંકર છ મહિના જેલમાં હતો. જેલમાંથી છૂટ્યા બાદ જાન્યુઆરી મહિનામાં એ મુંબઈ આવ્યો હતો.