ક્રાઇમ:બુહારીમાં એકતરફી પ્રેમમાં પાગલ યુવકે પરિણીતાના મોઢા પર જલદ પ્રવાહી ફેક્યું

વાલોડ તાલુકાના બુહારીમાં એકતરફી પ્રેમમાં પાગલ યુવકે પરિણીતા પર જલદ પ્રવાહી ફેક્યું હતું. ઘટના અંગે પોલીસ ફરિયાદ થતા આરોપીને જેલના સળિયા પાછળ ધકેલી દેવાયો હતો.બુહારી ખાતે રહેતી બે સંતાનોની માતા એવી પરણિતા સલોનીબેન [નામ બદલ્યું છે] ગતરોજ બપોર ઘર વાડામાં હતી તે વખતે આશિષ જોશી (રહે.ગોલવાડ, બુહારી) પાછળથી આવી મોઢાના ભાગે કોઈક પાણી જેવું પ્રવાહી ફેંક્યું હતું. મોઢાના ભાગે બળતરા થતા સલોનીને સહન ન થતા જમીન પર પડી ગઈ હતી

અને બુમાબુમ કરી મુકતા પરિણીતાના પતિ અને સસરા ઘરમાંથી બહાર આવી ગયા હતા. જોતા ગોલવાડમાં રહેતો આશિષ જોશી સ્થળ પરથી ભાગી ગયો હતો. પ્રવાહીને કારણે સલોનીને મોઢાના ભાગે બળતરા થતા 2 હોસ્પિટલ ફર્યા બાદ આખરે સારવાર અર્થે બારડોલી સરદાર સ્મારક હોસ્પિટલમાં ગયા હતા. ત્યાં ડોકટરે જમણી સાઈડ ગાલ પર બળતરા થતા હોય, પરંતુ કોઈ ગંભીર ઇજા કે ડાઘ ન પડેલ હોય. સારવાર આપી રજા આપી હતી. જે બાદ પોલીસમાં ફરિયાદ નોંધાવી હતી.

વાત નહીં કરે તો જાનથી મારી નાંખીશ
આશિષ પરણિતાને 8 વર્ષથી ઓળખતા હતો. છેલ્લા 6 માસથી અવાર નવાર પીછો કરી છેડતી કરતો હતો અને બે દિવસ અગાઉ પરણીતાને કહ્યું હતું કે તું મારી સાથે વાત ન કરશે તો હું તને જાનથી મારી નાખીશ.