અકસ્માત:સોનગઢના સોનારપાડામાં બાઈક ગરનાળાની દીવાલ સાથે અથડાતાં ચાલકનું મોત નીપજ્યું

સોનગઢ નજીક આવેલા સોનારપાડા ગામની સીમમાં ગુરુવારે મોડી સાંજના સમયે સર્જાયેલા અકસ્માતના બનાવમાં એક બાઇકચાલક પોતાનું બાઈક પૂરઝડપે હંકારી રોડની સાઈડ પર આવેલ ગરનાળાની દીવાલ સાથે અથડાવી મારતા ચાલકને ગંભીર ઇજા થઇ હતી અને એમનું સ્થળ પર મરણ થયું હતું.

ચીખલીખડકા રહેતા ભીમજીભાઈ ભીલીયાભાઈ ગામીત(55) ખેતી કરતા હતા અને બારડોલી ખાતે નાનું મોટું વેલ્ડિંગનું કામ કરી પરિવારનું ભરણપોષણ કરતા હતા. તેઓ ગુરુવારે બપોરના સમયે પોતાની બાઈક નંબર GJ-26-H-1281 લઈ સોનગઢ ખાતે કામ અર્થે આવ્યા હતા અને કામ પૂર્ણ કરી મોડી સાંજે સોનારપાડા-ડોસવાડા રસ્તા થઇ પરત પોતાના ઘરે ખડકાચીખલી ગામે જવા નીકળ્યા હતા.

સોનારપાડાની સીમમાં ગોગા મહારાજના મંદિર પાસેથી પસાર થઇ રહ્યા હતા ત્યારે બાઈકની વધુ ઝડપને કારણે સ્ટેયરિંગ પરથી કાબૂ ગુમાવતા બાઈક રોડની સાઈડ પર આવેલા ગરનાળાની દીવાલ સાથે અથડાઈ હતી અને ભીમજીભાઈ ગરનાળાની સામેની સાઈડ પર ઊંધા માથે પડયાં હતા. આ બનાવમાં તેમને માથામાં ગંભીર ઇજા થતા સ્થળ પર જ મોતને ભેટ્યા હતા. આ રોડ પર સાંજ થયા પછી અવરજવર ઓછી હોવાથી અકસ્માત અંગે કોઈને જાણ થઇ ન હતી. શુક્રવારે સવારે કોઈક રાહદારીએ આ અકસ્માત જોતા પોલીસને જાણ કરી હતી અને બાદમાં મરણ જનારની ઓળખ થઇ હતી.