માંગ:નિઝર જૂથ પાણી પુરવઠાની બોરદાથી નિઝર સુધી મેઇન પાઇપ લાઈનમાં અનેક લિકેજ

નિઝર તાલુકાના વેલદાથી બોરદા ગામ સુધી દક્ષિણ નિઝર જૂથ પાણી પુરવઠાની મેઇન પાઇપ લાઇનમાં ઠેર ઠેર ભંગાણ થતાં પાણીનો બગાડ થઈ રહ્યો છે. તેમજ ગામડાના લોકો અશુદ્ધ પાણી પીવા મજબૂર બન્યા છે. જેથી જવાબદાર તંત્ર જૂની પાઇપ લાઇનની જગ્યાએ નવી લાઈનની કામગીરી હાથધરે તેવી માંગ લોકો કરી રહ્યા છે.

નિઝર અને બોરદા વચ્ચેની પાઈપલાઈનોમાં ઠેર ઠેર લિકેજ જોવા મળી રહ્યું છે. નિઝર તાલુકાના પાણી પુરવઠાના મુખ્ય હેડ વર્કસ વેલ્દા ખાતે આવેલ છે અને આ પાણી પુરવઠા યોજના થકી ગામે ગામ પાણી પોંહચાડવા માટે મેઇન પાઇપ લાઈન કરવામાં આવેલ છે. તે લાઈનમાં ઘણી જગ્યાએ ડેમેજ હોવાથી રસ્તાની બાજુમાં તેમજ ખેતરોમાં પાણી વેડફાઇ જતાં અનેક જગ્યાએ પાણી પાણી જોવા મળે છે. જેના લીધે ગામના લોકોને આ યોજનાનો પૂરતો લાભ મળી નથી રહ્યો.

નિઝર તાલુકાના ગામડે ગામડે પાણી પુરવઠા યોજના હેઠળ પાણી ટાંકીઓ બની છે. જેમાં અમુક ગામની પાણીની ટાંકીમાં તો પાણી પહોંચતુ જ નથી, જેના લીધે ગામડાઓમાં જરૂરિયાત પૂરતું પાણી ન પહોંચતા લોકો પાણી માટે વલખાં મારે છે અને મજબૂરીમાં હેન્ડ પંપનું પાણી પીવા મજબૂર બનતા હોય છે.