અકસ્માત:શેરડી ભરેલા ટ્રેક્ટર પાછળ બાઇક અથડાઇ સળગી જતાં યુવકનું મોત

ડોલવણ તાલુકાના પાઠકવાડી ગામની સીમમાં રોડ પર શેરડી ભરેલું ટ્રેક્ટર ઊભું રહ્યું હતું. તે દરમિયાન ટ્રેક્ટરના પાછળના ભાગે ટેલર સાથે બાઇક પર આવતો એક 28 વર્ષીય યુવક અથડાતા માથા તેમજ શરીરના ભાગે ગંભીર ઇજા પહોંચતા મોત નીપજયું હતું. મોટરસાયકલ અથડાવાના સાથે જ સળગી જતાં યુવક પણ સળગી ગયો હતો. ડોલવણ તાલુકાના પાઠકવાડી ગામની સીમમાં આવેલા પટેલ ફળિયા નજીક વ્યારાથી ઉનાઈ જતા રસ્તા ઉપર ગત રાત્રિ દરમિયાન મહિન્દ્રા ટ્રેક્ટર નંબર gj19 af 7321ના ચાલક શેરડી ભરીને પસાર થઈ રહ્યો હતો. ત્યારે ટ્રેક્ટરમાં ડીઝલ પૂરું થતા ચાલકે ટ્રેક્ટર રોડની સાઈડ પર ઊભું રાખ્યું હતું. જે દરમિયાન શિવાનંદભાઈ અતુલભાઇ ગામીત (28) ( મૂળ જેસીંગપુરા અને હાલ બારતાડ) ગામે સંબંધીને ત્યાં રહેતા અને ડ્રાઇવિંગનું કામકાજ કરતો હતો. પોતાની બાઇક નંબર (GJ.26. 9910) લઈને પસાર થઈ રહ્યો હતો. ત્યારે અંધારામાં ઉભી રહેલા ટ્રેક્ટર અને ટેલર નજરે ન પડતા યુવક પાછળના ભાગે મોટરસાયકલ સાથે ધડકાભેર અથડાયો હતો. યુવકને માથામાં ગંભીર ઈજા પહોંચી હતી.

લોકો મદદ કરે તે પહેલાં આગ વકરી
મોટરસાયકલ ધડાકાભેર અથડાઈ જવાના કારણે ગણતરીના સમયમાં જ બાઇકમાં આગ લાગી ગઈ હતી. આગ એટલી તીવ્ર બની ગઈ હતી કે લોકો ઇજાગસ્ત યુવકની મદદ કરે તે પહેલા જ યુવક અને બાઇક આગની ઝપેટમાં આવી ગયા હતાં.