અકસ્માત:ઊનામાં પીછો કરતી પોલીસની ગાડીને ટક્કર મારતા ત્રિપલ અકસ્માત સર્જાયો

દીવથી નશામાં ધુત બે કાર ચાલકો તડ ચેક પોસ્ટ પાસે પહોંચતા પોલીસે કારને રોકવા ઈશારો કર્યો હતો. પરંતુ પૂરપાટ ઝડપે ચલાવી બેરીકડ ઉડાળી નાશી છુટતાં નવાબંદર પોલીસે ઝડપી પાડવા કારનો પીછો કર્યો હતો. જે દરમ્યાન આરોપીની કારે તડ-કેસરીયા ગામ વચ્ચે પોલીસની કારને ટક્કર મારી આગળ જઈ બાઈક ચાલકને હડફેટે લેતા ત્રીપલ અકસ્માત સર્જાયો હતો.ઘટનાના પગલે પોલીસ બોલેરો નં.જીજે 32 જી 0030 લઇ પીછો કરતા તેમાં સવાર કર્મી પ્રવિણભાઇ બાલુભાઇ તેમજ ડ્રાઇવરને ઈજા પહોંચી હતી.

નાશી છુટેલા કાર કાળા કલરની કાર નં.જીજે 15 સીએફ 4243 ચાલકે ભાડાસી ગામ પાસે બાઇકને પણ હડફેટે લેતા બાઇકમાં સવાર મહેશભાઇ નારણભાઇ તેમજ ઇશ્વરભાઇ નારણભાઇ બન્ને વ્યક્તિને પણશરીરના ભાગે ગંભીર ઇજા પહોચી હતી. તે જ સમયે ગ્રામજનોએ બન્ને આરોપીને પકડી પાડ્યા હતા. અને કારમાં રહેલો દારૂની સ્થાનિકોએ લુંટ મચાવી હતી. આ અંગેની નવાબંદર મરીન પોલીસ કર્મી પ્રવિણભાઇ મોરીએ આરોપી અશ્વિન મેરામણ દાહીમાં તેમજ ધર્મેશ જેશીંગ ચુડાસમા રહે. ડોળાસા તા.કોડીનાર બન્ને વિરૂધ્ધ ફરજ પર રૂકાવટ સહીતનો ગુનો નોંધી ધોરણસરની કાર્યવાહી હાથ ધરી છે.