દુખદ:ઊનાના યાજપુર પાસે છકડો પલ્ટી ખાતાં 1 મોત, 7 ને ઇજા; ચાલકે સ્ટિયરીંગ પરનો કાબુ ગુમાવતાં અકસ્માત સર્જાયો

ઊના-ભાવનગર હાઇવે પર યાજપુર ગામ પાસે છકડો રીક્ષા પલ્ટી ખાતાં રીક્ષામાં બેઠેલી 7 થી 8 વ્યક્તિને ઇજા થઇ હતી. જેમાં 1 વ્યક્તિ ગંભીર હોઇ સારવાર માટે રાજકોટ રીફર કરાઇ હતી. જ્યાં પહોંચે એ પહેલાં રસ્તામાંજ તેનું મોત નિપજ્યું હતું.

આ અંગેની પોલીસમાંથી પ્રાપ્ત વિગત મુજબ, રામભાઇ કાળુભાઇ ભાલિયા (રે. ગરાળ) પોતાની છકડો રીક્ષામાં પેસેન્જરો ભરી ઊના થી ગરાળ જતા હતા. એ દરમ્યાન ઊનાથી 5 કિમી દૂર હાઇવે પર યાજપુર ગામ પાસે અચાનક રીક્ષા ચાલકે સ્ટિયરીંગ પરનો કાબુ ગુમાવ્યો હતો. અને છકડો રીક્ષા પલ્ટી ખાઇ ગઇ હતી. આ બનાવમાં રીક્ષામાં બેઠેલા ઉગાભાઇ રાઠોડ, ડાયબેન (રે. દેલવાડા) તેમજ 7 થી 8 વ્યક્તિને નાનીમોટી ઇજા પહોંચી હતી. જેમાં ઉગાભાઇને માથાના ભાગે ગંભીર ઇજા થતાં 108 માં ખાનગી હોસ્પીટલે ખસેડાયા હતા. જ્યાંથી તેમને વધુ સારવાર માટે રાજકોટ રીફર કરાયા હતા. પણ રાજકોટ પહોંચે એ પહેલાંજ તેમનું મોત નિપજ્યું હતું. બનાવને પગલે મૃતકના પુત્ર જીતુભાઇએ ચાલક સામે ઊના પોલીસમાં ફરિયાદ નોંધાવી છે.