ચીમકી:10 દિ' માં બિયારણનું વળતર ન ચૂકવાય તો ચૂંટણીનો બહિષ્કાર

કોડીનાર તાલુકાના દેવળી ગામની મંડળી પાસેથી ઘઉંના બિયારણની ખરીદી કરી હતી. પરંતુ ઘઉં નહિ ઉગતા ખેડુતોને માઠી નુકસાની પડી હતી. વળતર ચુકવવામાં ઠાગાઠૈયા કરતા અસરગ્રસ્ત ખેડુતો દ્વારા સ્થાનિક સ્વરાજની ચુંટણીનો બહિષ્કાર તથા 10માં વળતર નહીં મળે તો ખેડુત પરિવાર દ્વારા સામુહિક આત્મવિલોપનની ચીમકી આપતો પત્ર રાજ્ય બીજ નિગમને લખી જાણ કરી છે. દેવળી ગામના 50 થી 60 ખેડુતોએ સરકારી મંડળી માંથી રાજ્ય બીજ નિગમ ઘઉં બિયારણ 173 જાતની ખરીદી કરી ખેતરમાં વાવેતર કરેલ હતું.

વાવેતરના 10 દિવસ પછી પણ ઘઉં નહિ ઉગતા ખેડુતોએ મંડળીમાં ફરિયાદ કરી હતી. જેની તપાસ કરતા આ બિયારણ ઉગવા લાયક ન હોવાનો રિપોર્ટ આવતા ખેડુતોને રૂ.1,400 ચુકવવા સહમતી આપી હતી. જ્યારે ખેડુતોએ રૂ. 5,000 વળતરની માંગણી કરતા આ મામલો ગુંચવાયો હતો. એક તરફ ખેડુતો બિયારણ તથા વાવેતર સહિતના ખર્ચની રકમની માંગણી કરી રહ્યા છે. ખેડુોતોના જણાવ્યા અનુસાર બીજ નિગમના નબળા બિયારણ અને ખામીના કારણે ખેડૂતોને નુકસાની વેઠવાનો સમય આવ્યો છે. જેથી 10 દિવસમાં વળતર નહિ અપાય તો ચૂંટણીનો બહિષ્કાર કરાશે.