જામીન:વાપીના ટ્રકચાલકને ચપ્પુ બતાવી લૂંટી લેનારના જામીન ફગાવાયા

વલસાડ નજીક ડુંગરી પાસે હાઇવે પર સુરત જવા માટે નિકળેલી ટ્રક બગડી જતાં ઉભા હતા ત્યારે અજાણ્યા ઇસમોએ છરી બતાવી રૂ.11 હજારની લૂંટ કરનાર આરોપીના જામીન વલસાડ સેશન્સ કોર્ટે ફગાવી દીધા છે.ડીજીપી અનિલ ત્રિપાઠીની દલીલ ગ્રાહ્ય રાખી સેશન્સ જજ એમ.કે.દવેએ જામીન અરજી રદ કરતો હુકમ કર્યો હતો. વાપીના બજરંગ ટ્રાન્સપોર્ટનો ડ્રાઇવર દિનેશ રતિલાલ યાદવ ટ્રકમાં કંપનીનો માલ ભરીને 9 માર્ચ 2017ના રોજ સુરતના પાંડેસરા જવા માટે નિકળ્યો હતો.દરમિયાન વલસાડના ડુંગરી હાઇવે પર  બે અજાણ્યા માણસોએ આવી ચઢી ગયા હતા.ત્યારબાદ ડ્રાઇવરના હાથમાં ઇજા પહોંચાડી મોબાઇલ અને રોકડ રકમ સહિત કુલ રૂ.11 હજારની લૂંટ ચલાવી ભાગી છુટ્યા હતા.આ ગુનામાં સંડોવાયેલા પોલિસે આરોપી મહેશ ઉર્ફે ભુરો રમેશ ચંદનશિવની ધરપકડ કરી હતી.આરોપી મહેશે તેની માતાની માંદગીનું કારણ દર્શાવી સેશન્સ કોર્ટમાં 30 દિવસના વચગાળાના જામીન માટે અરજી કરી હતી.