ક્રાઇમ:વાપીમાં રિક્ષા અટકાવવા જતાં GRD કર્મીને કચડવાનો પ્રયાસ

વાપી જીઆઇડીસીમાં પૂરઝડપે આવતી એક રિક્ષાને અટકાવવા જતા પોલીસ કર્મીની બાઇક અડફેટમાં આવી હતી. જેમાં કર્મીને ગંભીર ઇજા થતા હોસ્પિટલમાં ખસેડાયો હતો. વાપી જીઆઇડીસી પોલીસ મથકમાં જીઆરડી તરીકે ફરજ બજાવતો ગૌતમકુમાર ઘેવરલાલ માલી શનિવારે રાત્રે સરદાર ચોક વિસ્તારમાં પેટ્રોલીંગમાં હતો.

દરમિયાન જે-ટાઇપ મસ્જિદ પાસે પહોંચતા અંબામાતા સર્કલ તરફથી પૂરઝડપે આવતી રીક્ષા નં.જીજે-15-વાય-5054ને અટકાવવા ઇશારો કરતા તે નાસી છૂટ્યો હતો. જેથી બાઇકથી તેનો પીછો કરતા દાન હોટલ પાસે ચાલકે રીક્ષા સર્પાકાર ચલાવતા બાઇક તેની અડફેટમાં આવી હતી. જેને લઇ જીઆરડી કર્મી રોડ પર પડતા હાથ-પગ અને મોઢાના ભાગે તેને ગંભીર ઇજા પહોંચી હતી.

બનાવ બનતા જ આ અંગે જીઆઇડીસી પીએસઆઇ એ.કે.દેસાઇને જાણ કરતા તપાસમાં આ રિક્ષા કોચરવા ભવાની માતાના મંદિર પાસે પલટી મારેલી હાલતમાં મળી આવી હતી. રિક્ષાને કબજે લઇ પોલીસે ફરાર ચાલકની તપાસ હાથ ધરી છે. જીઆઇડીસી પોલીસે રિક્ષા નંબર ના આધરે ફરાર ચાલકને શોધવાની તજવીજ હાથ ધરી છે.