કોરોના મહામારી:દમણમાં 18 દિવસ બાદ કોરોનાના 2 પોઝીટિવ કેસ

દમણમાં કોરોનાના કેસો શૂન્ય થયાના 18 દિવસ બાદ શુક્રવારે 2 પોઝિટિવ કેસ આવ્યા છે. જેને લઇ પ્રશાસને થોડા દિવસ પહેલા ઉતાવળે ત્રણેય સંઘપ્રદેશ કોરોના મુક્ત થયાની કરેલી જાહેરાત પોકળ સાબિત થઇ છે અને તમામ વિભાગોને સાવચેત કરી દીધા છે. દમણમાં છેલ્લા 18 દિવસથી કોરોનાના એક પણ કેસો પોઝીટિવ ન આવતા લોકો હાશકારો અનુભવી રહ્યા હતા. જોકે શુક્રવારે બે વ્યક્તિ કોરોના ટેસ્ટમાં પોઝીટિવ આવતા તાત્કાલિક સારવાર શરૂ કરાઇ હતી.

દમણમાં અત્યાર સુધી કોરોના પોઝીટિવના કુલ 1387 દર્દીઓ સાજા થયા હતા. જ્યારે એક વ્યક્તિએ જીવ ગુમાવ્યો હતો. હાલ બે વ્યક્તિ પોઝીટિવ આવ્યા છે જોકે એક પણ વિસ્તારને કન્ટેઇનમેન્ટ ઝોન જાહેર કરવામાં આવ્યા નથી. ઉલ્લેખનિય છે કે, બે દિવસ પહેલા સંઘપ્રદેશ પ્રશાસનના આરોગ્ય વિભાગ દ્વારા સેલવાસના એક માત્ર કોરોના પોઝિટિવ કેસ પણ રિકવર થઇ જતા દમણ,દીવ અને દાનહ ત્રણેય સંઘપ્રદેશ કોરોના મુક્ત થઇ ગયા હોવાની ઉતાવળે જાહેરાત કરી દીધી હતી.