દુ:ખદ:નોકરીના તાણમાં ઝેર પીનાર સુખલાવના યુવકનું અંતે મોત

તાલુકાના સુખલાવ ગામે અતુલ ફળિયા ખાતે રહેતો 20 વર્ષીય સંદીપભાઈ સંજયભાઈ પટેલ ગત 7 ફેબ્રુઆરીએ તબિયત લથડતા મોઢામાંથી ફીણ નીકળવા સાથે બેભાન થઈ ગયો હતો. જેને સારવાર માટે પારડી ખાનગી હોસ્પિટલમાં દાખલ કર્યો હતો. જ્યાં તબીબના નિદાન દરમિયાન સંદીપે કોઈ ઝેર પીધાનું પરિવારને જણાવ્યું હતું.

જે બાદ સંદીપને વધુ સારવાર માટે સિવિલ હોસ્પિટલ લઈ જઈ દાખલ કરાયો હતો. જ્યાં સારવાર દરમિયાન સંદીપે દમ તોડ્યો હતો. આ અંગે પારડી પોલીસ મથકે જાણ કરતા પારડી પોલીસે લાશનો કબ્જો લઈ વધુ કાર્યવાહી હાથ ધરી છે. જોકે સંદીપ ઘણા સમયથી નોકરીએ જતો ન હતો જેથી તેના ટેન્શનમાં આવી આ પગલું ભર્યું હોવાનું પરિવારે પોલીસને જાણ કરી હતી.