વિકાસ કામોમાં અવરોધ:સ્ટોન ક્વોરી સંચાલકોની હડતાળથી 8 રેલવે બ્રિજના કામો મંથરગતિએ, નવા માર્ગો સહિત અનેક પ્રોજેક્ટ અટવાયા

વલસાડ10 દિવસ પહેલા
  • કૉપી લિંક
  • વલસાડ જિલ્લામાં 300 કરોડના વિકાસીય કામોને હડતાળનું ગ્રહણ
  • રો મટિરિયલની અછતથી કપરાડા-મોટાપોંઢા બ્રિજનું કામ બંધ
  • માર્ચ 2023 સુધીની મર્યાદામાં પૂર્ણ કરવાના કામો ધીમા પડ્યા

વલસાડ જિલ્લા સહિત સમગ્ર ગુજરાતમાં ક્વોરી સંચાલકોની અચોક્કસ મુદ્દતની હડતાળ છેલ્લા 13 દિવસથી ચાલી રહી છે પરંતું હજી તેનો ઉકેલ ન આવતાં સરકારી કામોમાં અવરોધ ઉભો થયો છે.વલસાડ જિલ્લામાં માર્ગ અને મકાન વિભાગ દ્વારા નિર્માણ પામનારા લોકોપયોગી આ કામો ધીમા પડી ગયા ક્યાં તો કેટલાક બંધ થઇ ગયા છે.જિલ્લામાં સરકારી પ્રોજ્કેટોના રૂ.300 કરોડના કામોને અસર થઇ રહી છે.

ગુજરાતભરમાં કવોરી સંચાલકોની હડતાળના પગલે કપચી,ગ્રીટ,ઝીણી કપચી,સ્ટોન જેવા માલસામાન ની અછત વર્તાવા લાગી છે. જિલ્લામાં ખાસ કરીને રેલવે ફાટકો ઉપર ચાલી રહેલા મોટા બ્રિજના 8 કામો માર્ગ અને મકાન વિભાગ દ્વારા શરૂ કરેલા જેની સમયમર્યાદા ડિસેમ્બર-2022થી લઇ માર્ચ 2023 સુધીની નક્કી કરાયેલી છે,જે કામો 1 મે 2022થી ચાલી રહેલી ક્વોરી સંચાલકોની હડતાળને પગલે બંધ પડવાની ભીતિ છે.

હડતાળ પહેલા માર્ગ અને મકાન વિભાગની એજન્સીઓ માલ સ્ટોક કરાયો હતો તે હડતાળનો અંત જલ્દી ન આવે તો પૂરો થઇ જવાની ભીતિ વર્તાઇ રહી છે.હાલે આ બ્રિજના જે કામો ચાલી રહ્યા છે તે પણ કપચી,ગ્રીટની અછતના કારણે ધીમા અને મંથર ગતિએ ચાલી રહ્યા છે.જિલ્લામાં રસ્તાના બે કામો બંધ કરી દેવાની નોબત આવી છે.જેને લઇ આગામી દિવસોમાં જો રાજ્ય સરકાર ક્વોરી સંચાલકો સાથે બેઠક કરી યોગ્ય ઉકેલ ન લાવે તો મુશ્કેલી સર્જાવાની દહેશત વર્તાઇ રહી છે.

સીધી અસર - 20 થી 45 કરોડની રેન્જના 7 રેલવે બ્રિજ પ્રોજેક્ટ પણ મંથર ગતિએ

  • એલસી નં.94 રેલવે ફાટક- અતુલ દિવેદ
  • એલસી નં.90 રેલવે બ્રિજ પારડી
  • ​​​​​​​એલસી નં.84 બગવાડા ટોલ પ્લાઝા
  • એલસી નં.82 મોરાઇ ફાટક
  • એલસી નં.75 કરમબેલા તા.ઉમરગામ બ્રિજ
  • એલસી નં.71 મલાવ રેલવે ફાટક બ્રિજ
  • એલસી નં.101 ચીખલા ફાટક,વલસાડ

​​​​​​​જિલ્લામાં 3 પુલોના કામોને અસર

  • બાંધખાડી પુલ,તા.ઉમરગામ
  • કપરાડા તાલુકા,મોટાપોંઠા ફળિયા રોડનો પુલ
  • ધરમપુર તાલુકો,સ્વર્ગવાહિની નદીનો પુલ

વલસાડમાં 115 કરોડનો ROB પ્રોજેક્ટનું કામ ધીમું
વલસાડમાં ધરમપુર રોડ,અતુલ રોડ અને વલસાડ શહેર તરફના રોડના ત્રિપાંખિયા રેલવે ઓવર બ્રિજનો મોટો પ્રોજેક્ટ ધીમો પડી ગયો છે.આ પ્રોજેક્ટ રૂ.115 કરોડનો છે,જેની સમય મર્યાદા માર્ચચ-2023 સુધીની છે,પરંતું ક્વોરીવા‌ળાઓની હડતાળથી કામગીરી મંથર ગતિએ થઇ રહી છે.

R&B દ્વારા નિર્મીત 3 મકાનોનું કામ અટવાયું
જિલ્લાના ધરમપુર તાલુકાના બારોલિયા ગામે રાજ્ય બીજ નિગમના ગોડાઉનનું કામ ચાલુ છે,પરંતુ હડતાળથી ધીમુ પડ્યું છે.આ ઉપરાંત પારડી તાલુકાના ઉદવાડામાં સીટી સર્વે કચેરીના બાંધકામનું કામ પણ અવરોધાયું છે.

રસ્તાના કામોને મોટી અસર, અવધિ 31 જૂન 2022 સુધીની
રસ્તાના કુલ 5 કામ માર્ગ અને મકાન વિભાગ દ્વારા થઇ રહ્યા છે,જેમાં ડુંગરી અંદરગોટા રોડ અને ખુંટેજ-ડુમલાવ રોડના કામ બંધ કરવા પડ્યા છે.જ્યારે બીજા 3 કામ ધામણી-ટોકરપાડા,વાપી કોપરલી અને ટુકવાડાનો સીસી એપ્રોચ રોડના કામ ધીમા પડી ગયા છે.રસ્તાના આ કામો 31 જૂન 2022 સુધી પૂર્ણ કરવાની સમય મર્યાદા છે.

ચોમાસામાં હાલાકી - 3 બ્રિજ પૈકી મોટાપોંઢા-કપરાડા બ્રિજનુ કામ બંધ

  • માર્ગ અને મકાન વિભાગ દ્વારા 3 પુલ બ્રિજ પૈકી 1નું કામ બંધ
  • ​​​​​​​​​​​​​​ક્વોરી સંચાલકોની હડતાળના પગલે કપચી,ગ્રીટના સપ્લાયને અસર થતાં વલસાડ જિલ્લામાં માર્ગ અને મકાન વિભાગ દ્વારા ઉમરગામ બાંધીખાડી બ્રિજ,ધરમપુર સ્વર્ગવાહિની બ્રિજ અને કપરાડા-મોટાપોંઢા બ્રિજના કામોને પડેલી અસરને લઇ કપરાડા-મોટા પોંઢા બ્રિજનું કામ બંધ કરવામાં આવ્યું છે.આ કામોની સમય મર્યાદા પણ 31 મે 2022 સુધીની હોવાથી આ ગાળામાં કામ થઇ શકે તેવી સ્થિતિ નથી.

રસ્તાના 5 કામોને અસર

  • ડુંગરી અંદરગોટા એપ્રોચ રોડ,તા.વલસાડ
  • ખુંટેજ-ડુમલાવ રોડ,તા.પારડી
  • ધામણી-ટોકરપાડા,તા.ધરમપુર
  • વાપી- કોપરલી રોડ,તા.વાપી
  • ​​​​​​​ટુકવાડા એપ્રોચ રોડ,તા.વાપી

સંચાલકોએ CMને મળી સમસ્યાની રજૂઆત કરી
ગુજરાતમાં ક્વોરી સંચાલકોની અચોક્કસ મુદ્દતની હડતાળને લઇ સરકારી પ્રોજેકટોના કામો અટવાઇ રહ્યા છે ત્યારે આ હડતાળનો વહેલો ઉકેલ આવે તે માટે ગુજરાતભરના ક્વોરી સંચાલકોએ મુખ્યમંત્રી ભુપેન્દ્ર પટેલ સાથે મુલાકાત કરી ચર્ચા કરી છે અને હડતાળનો નિરાકરણના પ્રયાસો કર્યા છે.

ROBની સમયમર્યાદા લાંબી છે, પરંતું પુલ, રસ્તાના કામોને અસર
હાલમાં ક્વોરી સંચાલકોની હડતાળ ચાલૂ હોવાથી સ્ટોક સપ્લાય બંધ છે.જ્યાં સ્ટોક છે ત્યાં બ્રિજ,પુલો રસ્તાના કામો ધીમા ચાલી રહ્યા છે,તે પણ હડતાળનો ઉકેલ જો વહેલો ન આવે તો મુશ્કેલી સર્જાવાની સંભાવના છે.31 જૂન 2022 સુધીની સમય મર્યાદામાં રસ્તાના 5 કામ,પુલ બ્રિજના 3 કામ પૂર્ણ કરવામાં તકલીફ થઇ શકે છે.તેમાં રસ્તાના કામમાં ડુંગરી અંદરગોટા રોડ અને ડુમલાવ-ખુંટેજ રોડનું કામ બંધ કરવું પડ્યું છે.જ્યારે મોટાપોંઢા-કપરાડા બ્રિજનું કામ પણ બંધ થયું છે. - એન.એન.પટેલ,કાર્યપાલક ઇજનેર,R&B

અન્ય સમાચારો પણ છે...