આપઘાત:વલસાડમાં આર્થિક તંગીથી કંટાળીને આધેડે ફાંસો ખાધો

વલસાડના રાણા સ્ટ્રીટમાં રહેતા 55 વર્ષીય આધેડે રવિવારે બપોરે પોતાના ઘરના રસોડામાં ફાંસો ખાઈ આત્મહત્યા કરી હતી. લોકડાઉન બાદ આર્થિક મંદીમાં સપડાઈ ગયેલા આધેડે ફાંસો ખાઈ લેતા વિસ્તારમાં ચકચાર મચી ગઇ હતી.વલસાડના રાણા સ્ટ્રીટમાં રહેતા પંકજભાઈ છબીલદાસ રાણા, ઉ.વ.55, ટેમ્પો ચલાવતા હતા. લોકડાઉન દરમિયાન ટેમ્પાનો ધંધો ઠપ.થઈ જતા પરિવાર આર્થિક મંદીમાં સપડાઈ ગયો હતો.

પંકજભાઈ રવિવારે 11:30 કલાકે તેમની પત્નીએ રસોઈ બનાવી જમાળી દીધા હતા. અન્ય ઘરોમાં રસોઈના કામ કરવા જતાં રહ્યાં હતાં. એક દીકરો બાઇકમાં પેટ્રોલ પુરાવા ગયો હતો અને નાનો દીકરો મહોલ્લામાં રમવા ગયા હતા. પંકજભાઈએ ઘરના રસોડામાં એંગલ સાથે ફાંસો ખાઈ જીવન ટૂંકાવ્યું હતું. પંકજભાઈ રાણાએ ફાંસો ખાધો ત્યારે ઘરમાં કોઈ હતું નહીં.

નાનો દીકરો યુગ ઘરમાં આવતા પિતાને ફાંસો ખાધેલી હાલતમાં જોઈને ઘરની બહાર આવી બુમાબુમ કરતા સ્થાનિક લોકો દોડી આવ્યા હતા. બનાવ અંગે સીટી પોલીસને જાણ કરતા લાશનો કબ્જો મેળવીને આગળની તપાસ હાથ ધરી હતી. બનાવ અંગે ભત્રીજા યશ રાણાએ સીટી પોલીસ મથકે બનાવની નોંધ કરીને આગળની તપાસ હાથ ધરી છે. પોલીસે FSLની ટીમની મદદ મેળવીને પ્રાથમિક તપાસ હાથ ધરતા પંકજભાઇ પાસેથી કોઈ સ્યુસાઇડ નોટ મળી ન હતી.