ભાસ્કર એનાલિસિસ:વલસાડ,પારડીમાં ભાજપનો વોટ શેર વધ્યો, કપરાડા- ધરમપુરમાં ઘટ્યો

વલસાડ જિલ્લામાં વિધાનસભા ચૂંટણી-2022માં ભાજપની પાંચે બેઠક ઉપર ભવ્ય જીતના કારણે આ તમામ વિધાનસભા મત વિસ્તારોમાં ભાજપના મત શેરમાં ઉછાળો આવ્યો છે. જેની સામે કોંગ્રેસ ઉંધા માથે પટકાઇ છે. આ ચૂંટણીમાં ભાજપ સરકાર ઉપર મતદારોએ ભરોસો રાખી તમામ 5 બેઠકો ઉપર ખોબે ખોબા મત આપી ભાજપને અદભૂત વિજયની ભેટ ધરી છે. જેના કારણે તમામ મત વિસ્તારોમાં ભાજપનો જનાધાર ટોચે પહોંચ્યો છે. જ્યારે કોંગ્રેસ તળિયે પહોંચી છે. જો કે ધરમપુર અને કપરાડામાં 2022માં આપની સ્પર્ધાના કારણે 2017ની ચૂંટણીમાં ભાજપનો જે વોટ શેર હતો તેમાં ઘટાડો નોંધાયો છે.

વલસાડ જિલ્લામાં વલસાડ, પારડી, ધરમપુર, કપરાડા અને ઉમરગામ વિધાનસભા બેઠકોની ચૂંટણીમાં સરેરાશ 69.40 ટકા મતદાન થયું હતું. 8 ડિસેમ્બરના રોજ જાહેર થયેલા પરિણામોમાં જિલ્લાની 5 બેઠકો પૈકી વલસાડમાં ભાજપના ઉમેદવાર ભરતભાઇ પટેલની રેકોર્ડ લીડ અને પારડીમાં નાણાં મંત્રી કનુભાઇ દેસાઇની વિક્રમી લીડના કારણે આ બંન્ને તાલુકામાં ભાજપનો જનાધાર ખુબ ઉંચો ગયો છે. જ્યારે ઉમરગામ, કપરાડા અને ધરમપુરમાં પણ કોંગ્રેસની સરખામણીમાં ભાજપના જનાધારમાં નોંધપાત્ર વધારો જોવા મળ્યો છે. તેમ છતાં ધરમપુર અને કપરાડામાં આ ચૂંટણીમાં ઉમેદવારો તો જીતી ગયા પણ ભાજપના વોટ શેરમાં ગાબડું પડ્યું છે.

વલસાડ, પારડી , ઉમરગામમાં ભાજપના જનાધારમાં વધારો થયો છે. જયારે કપરાડા અને ધરમપુરમાં જનાધાર ઘટી રહ્યો છે. જે ભાજપ માટે ચિંતાનો વિષય બની રહ્યો છે. જોકે કોંગ્રેસના ગઢમાં પણ ગાબડા પડી રહ્યા છે.

કપરાડામાં આપના કારણે ભાજપનો વોટ શેર 43.46 ટકા પર પહોંચી ગયો
ધરમપુરમાં ભાજપના અરવિંદ પટેલનો વર્ષ 2017માં વોટ શેર 53.53 ટકા હતો જે વર્ષ 2022માં 11.29 ઘટીને 42.24 ટકા થયો છેજ્યારે કપરાડાના જીતુભાઈ ચૌધરી વર્ષ 2017ની ચૂંટણીમાં કોંગ્રેસમાં હતા ત્યારે 170 મતની સરસાઈથી વિજય થયા હતા ત્યારે તેમનો વોટ શેર 47.59 ટકા હતો ત્યાર બાદમાં ભાજપમાં પ્રવેશ થતા વર્ષ 2020માં પેટા ચૂંટણી થતા જીતુભાઈ પોતાના પ્રતિસ્પર્ધીથી 47066 મતે વિજય થતા તેમનો વોટ શેર 60.43 ટકા થયો હતો. વર્ષ 2022ની ચૂંટણીમાં તેમનો વોટ શેર 16.97 ટકા ઘટીને 43.46 ટકા નોંધાયો છે.

વલસાડ તાલુકામાં 12.43 ટકાનો વધારો, ઉમરગામમાં 3.71 ટકા વધ્યા
વલસાડ બેઠક પર 1 લાખથી વધુ પ્રચંડ સરસાઇથી જીતનાર ભાજપના ભરતભાઈ પટેલનો વર્ષ 2017ની ચૂંટણીમાં વોટ શેર 60.49 ટકા હતો જે વર્ષ 2022ના પરિણામમાં 12.43 ટકા વધીને 72.92 ટકા થયો છે.ઉમરગામના ભાજપના રમણલાલ પાટકરનો વર્ષ 2017માં વોટ શેર 60.87 ટકા હતો જે વર્ષ 2022માં 3.71 ટકા વધીને 64.58 ટકા થયો છે.