રાજ્યમાં ધુળેટી બાદ કોરોના સંક્રમણ વધ્યું:વલસાડ તાલુકામાં આજે એક પોઝિટિવ કેસ નોંધાયો, વેરિયન્ટની તપાસ માટે સેમ્પલ મોકલવામાં આવ્યા

ધુળેટી પર્વ બાદ રાજ્યમાં કોરોના સંક્રમણ વધ્યું છે. જેને લઈને વલસાડ જિલ્લામાં પણ કોરોના સંક્રમણ ધીમી ગતિએ વધી રહ્યું છે. આજે વલસાડ તાલુકાની એક મહિલા સંક્રમિત જાહેર થતા જિલ્લાનું વહીવટી તંત્ર અને આરોગ્ય વિભાગ સતર્ક બન્યું છે. વલસાડ તાલુકાની ગૃહિણીને સામાન્ય લક્ષણો જાણતા ગૃહિણીએ આરોગ્ય વિભાગમાં કોરોના ટેસ્ટ કરાવ્યો હતો. જે કોરોના સંક્રમિત જાહેર થતા વલસાડ જિલ્લાનું વહીવટી તંત્ર અને આરોગ્ય વિભાગ દોડતું થયું છે. વલસાડ તાલુકામાં સંક્રમણ વધતું અટકાવવા આરોગ્ય વિભગની ટીમ એલર્ટ થઈ ગઈ છે. આજે જાહેર સંક્રમિત જાહેર થયેલી મહિલાના સંપર્ક હિસ્ટ્રી મેળવી મહિલાના ઘરની આજુબાજુના વિસ્તારમાં જન જાગૃતિ અભિયાન હાથ ધર્યું છે.

રાજ્યમાં ધીરે ધીરે કોરોના સંક્રમણ વધી રહ્યું છે. જેને લઈને રાજ્ય આરોગ્ય વિભાગે રાજ્યના તમામ જિલ્લાઓમાં આરોગ્ય વિભગની ટીમને સતર્ક રહેવા સૂચનાઓ આપી દેવામાં આવી છે. ધુળેટી પર્વ બાદ વલસાડ જિલ્લા સહિત રાજ્યમાં કોરોનાની ધીમી ગતિએ એન્ટ્રી થઈ ચુકી છે. વલસાડ તાલુકામાં રહેતી એક ગૃહિણીને કોવિડને સામાન્ય લક્ષણો જણાય આવતા નજીકના આરોગ્ય કેન્દ્ર ઉપર જઈને કોવિડ RTPCR ટેસ્ટ કરાવ્યો હતો. જેમાં મહિલા કોરોના સંક્રમિત જાહેર થઈ હતી. જેને લઈને વલસાડ જિલ્લામાં કુલ 2 કોરોના સંક્રમિત એક્ટિવ કેસ જાહેર થયા હતા. જેને લઈને જિલ્લાનું વહીવટી તંત્ર અને જિલ્લા આરોગ્ય વિભાગની ટીમ દોડતી થઈ હતી. વલસાડ તાલુકામાં આજે સંક્રમિત જાહેર થયેલી મહિલાના સંપર્કમાં આવેલા લોકોની કોન્ટેક હિસ્ટ્રી મેળવી તેમને ટ્રેસિંગ કરવાની કામગીરી હાથ ધરી છે. મહિલાના ઘરની આજુબાજુના વિસ્તારમાં આરોગ્ય વિભાગે કોરોના જાગૃતિ અભિયાન હાથ ધર્યું છે. સાથે આજુબાજુના વિસ્તારમાં કોવિડને સામાન્ય લક્ષણો ધરાવતા લોકોના ટેસ્ટિંગ કરવાની કાર્યવાહી હાથ ધરવામાં આવી છે.

વલસાડ તાલુકામાં આગળ જાહેર થયેલા 76 વર્ષીય વૃદ્ધના સંપર્કમાં આવેલા 9 લોકોના RTPCR ટેસ્ટ કરાવતા તમામના રિપોર્ટ કોવિડ નેગેટિવ આવતા આરોગ્ય વિભાગે હાશકારો અનુભવ્યો હતો. તેજ રીતે આજે સંક્રમિત જાહેર થયેલી ગૃહિણીના પરિવારના અને સંપર્કમાં આવેલા લોકોની યાદી મેળવી જિલ્લા આરોગ્ય વિભગની ટીમે તેમના RTPCR સેમ્પલ લેવાની તજવીજ હાથ ધરી છે. વલસાડ જિલ્લામાં એક્ટિવ કેસનો આંક વધીને 2 ઉપર પહોંચી ગયો છે. જિલ્લા આરોગ્ય વિભાગે કોરોના સંક્રમણ અટકાવવા સંક્રમિત જાહેર થયેલા દર્દીના આજુબાજુના વિસ્તારમાં સતર્કતા હાથ ધરીને સંક્રમણ અટકાવવાના પ્રયાસો હાથ ધરવામાં આવ્યા છે.