બે ભાઈઓના પરિવાર વચ્ચે ઝઘડો:અણગામમાં ટેમ્પો ભાડાની અદાવતે બે પરિવાર બાખડ્યા

અણગામ ખાતે મંગળવારના રોજ રાત્રીના 8.45 કલાકે સરીગામ જીઆઇડીસીમાં ટેમ્પા વધારે ચાલવાની અદાવત રાખી બે ભાઈઓના પરિવાર વચ્ચે ઝઘડો થયો હતો. મોટાભાઈને માથામાં ઇજા પહોચતાં સારવાર અર્થ હોસ્પિટલમાં ખસેડવામાં આવ્યો હતો. સરીગામની કંપનીમાં ટેમ્પો ભાડા મારવાની અદાવતમાં બે ભાઈઓના પરિવાર વચ્ચે ઝઘડો થયો હતો.

જેમાં હસમુખભાઈ નાનુભાઈ આહીર, સુનિલભાઈ મગનભાઈ આહીર, જીતુભાઇ હસમુખભાઈ આહીર અને ભાવિનભાઈ ગુલાબભાઈ આહિરે મગનભાઈ નાનુભાઈ આહીર, દિપક અને જીગ્નેશ સાથે બોલાચાલી કરી નાલાયક ગાળો આપી ઢીક્કા મુક્કીનો માર મારી મગનભાઈને માથામાં લાકડાનો ફટકો મારતા તેમને લોહીલુહાણ હાલતમાં ભીલાડ સરકારી હોસ્પિટલમાં ખસેડવામાં આવ્યા હતા. આ ઈસમોએ પરિવારને જાનથી મારી નાખવાની ધમકી આપતા ઉપરોકત ઈસમો વિરુદ્ધ ભીલાડ પોલીસ મથકમાં ફરિયાદ નોંધાવી છે.