કોરોનાવાઈરસ:વાલિયા સીએચસી પાછળ બાયો મેડિકલ વેસ્ટ ફેંકતા લોકોમાં ભય

વાલિયા તાલુકાનાં સરકારી દવાખાનામાં નિયમિત સફાઈ નહીં થતી હોવાનું સામે આવ્યું છે. તાલુકામાં અગાઉ 2 લેબ ટેક્નિશિયન અને હાલમાં 3 એસઆરપી જવાનો કોરોના પોઝિટિવ આવ્યા હતા. આ સરકારી દવાખાનામાં કોરોનાનું ટેસ્ટિંગ થાય છે. ટેસ્ટીંગ થયા બાદ વપરાયેલો મેડિકલ વેસ્ટ ખુલ્લામાં નાખી દેવાતા લોકોમાં ભય ફેલાયો છે. વાલિયાના સામુહિક આરોગ્ય કેન્દ્રની બેદરકારી છતી થઈ છે. પીપીઈ કિટનો ઉપયોગ કરી ગમે ત્યાં નાખી દેવામાં આવે છે. અઠવાડિયામાં ત્રણ દિવસ બાયોમેડિકલ વેસ્ટ ભરવા આવતી ગાડીમાં નહીં મોકલી સરકારની ગાઈડલાઈનનું ઉલ્લંઘન થઈ રહ્યું છે.

દવાખાનાના કમ્પાઉન્ડના ખુલ્લા કૂવામાં અને દીવાલ પાછળ  કોરોના ટેસ્ટિંગમાં વપરાયેલી પીપીઈ કીટ, માસ્ક ,ગ્લોઝ , ઈન્જેકશન, દવા, દર્દીઓના કપડા ફેંકી દેવાયા છે.  કોરોનાના કહેર વચ્ચે સરકારી હોસ્પિટલોમાં જ કોરોના સંક્રમિતો વધી ગયા છે જે આવી બેદરકારીઓનો ભોગ બની રહ્યા છે. લોકો હવે વાલિયા સરકારી દવાખાને આવતાં ગભરાય છે. યોગ્ય તપાસ કરી કસૂરવારો ઉપર કાર્યવાહી કરવી જોઈએ