હડતાલ:સાવલી હોમિયોપેથિક મેડિકલ કોલેજના વિદ્યાર્થીઓએ રસ્તા રોકી વિરોધ નોંધાવ્યો

સાવલી મેડિકલ કોલેજમાં ઈન્ટરશીપ કરતા વિદ્યાર્થીઓને 5200 ની જગ્યાએ 9000 રુપિયા ચૂકવવા નો સરકાર નો પરિપત્ર હોવા છતાંય ત્રણ મહિનાથી બિલકુલ ન ચૂકવાતા વિવાદ વકર્યો હતો. ગતરોજ કોલેજની બહાર ધરણા પર બેસી શંખનાદ, ઘંટનાદ, થાળી વગાડી સરકાર સામે પોતાનો વિરોધ નોંધાવ્યો હતો. જો માગણી નહીં સ્વીકારાય તો ગાંધીનગર ખાતે વિધાનસભાનો ઘેરાવો કરવાની પણ ચિમકી ઉચ્ચારી હતી.

આ બનાવના પગલે સાવલી પોલીસ ઘટના સ્થળે પહોંચીને 70થી વધુ વિદ્યાર્થીઓને ડિટેઇન કર્યા હતા. આ સમયે ભારે ઉત્તેજનાસભર દૃશ્યો સર્જાયા હતા અને વિદ્યાર્થીઓએ સરકાર વિરુદ્ધ તેમજ કોલેજ સત્તાવાળાઓ વિરુદ્ધ નારેબાજી કરતા રાહદારીઓમાં પણ ભારે કૌતુક ફેલાયું હતું. આમ છેલ્લા ત્રણ દિવસથી સ્ટાઇપંડ મુદ્દે ચાલતા વિવાદે ભારે રાજકીય સ્વરૂપ ધારણ કરી લીધું છે. જ્યારે વિદ્યાર્થીઓએ આગામી સમયમાં વિધાનસભાનો ઘેરાવ કરવા ચીમકી ઉચ્ચારી છે.