અકસ્માત:સંખેડા તાલુકાના મોરડ ગામમાં બે વર્ષનું બાળક ટ્રકના પૈડા નીચે કચડાયું : ટ્રક ચાલક સ્થળ પરથી નાસી છૂટ્યો

સંખેડા તાલુકાના મોરડ ગામે ઇંટો ભરવા માટે આવેલી ટ્રક ચાલકની લાપરવાહીના કારણે બે વરસનો માસૂમ ટ્રકના તોતિંગ પૈડા નીચે કચડાયો હતો. લીમડાના ઝાડ નીચે માસૂમ બાળક રમતો હતો ત્યારે આ અકસ્માત સર્જાયો હતો. લાલાભાઇ સોમાભાઇ મહિડા મોરડ ગામે ઇંટોના ભઠ્ઠામાંથી પાકી ઇંટો કાઢીને ગાડીમાં ભરવાની મજૂરી કરે છે. પત્નિ સવિતાબેન અને ચાર બાળકો છે. દિવાળી બાદથી અહિયા મજૂરી કરવા માટે આવેલા છે. સોમવારે સવારે આઠેક વાગ્યાના સુમારે લાલાભાઇ અને તેની પત્નિ ઇંટોના ભઠ્ઠામાં પાકી ઇંટો કાઢવા માટે ગયા હતા. ત્યારે છોકરાઓ ઝૂંપડા બહાર લીમડાના ઝાડ નીચે રમતા હતા.

સવારે 11થી 11-30 વાગ્યાના સમયે સવિતાબેન ઘરે રમતા છોકરાઓને જોવા માટે ગઇ હતી. પછી તે દોડતી બૂમો પાડતી તેના પતિ પાસે પહોચીને તેને જણાવેલ કે તેમને બે વરસનો દિકરો વિકેસ લીમડાના ઝાડ નીચે રમતો હતો. તેના ઉપર ટ્રકના ડ્રાઇવર સતીષ તડવી રહે.વડેલીએ પોતાની ટ્રકને એકદમ પુરઝડપે આગળ પાછળ કરતા છોકરા વિકેસ ઉપર ટ્રકનું પાછળનું ટાયર ચઢાવી દેતા તેણીએ બૂમો પાડતા ટ્રક મુકીને તે નાસી છુટ્યો હતો. બે વર્ષના વિકેસના પેટ અને માથા ઉપર ટ્રકનું ટાયર ચઢી જતા માથા અને પેટના અવયવો ફાટી બહાર નિકળી ગયા હતા. ટ્રક ચાલક સતિષ તડવી ત્યાંથી નાસી છુટ્યો હતો. બાળકના મૃતદેહને સંખેડા રેફરલ હોસ્પીટલમાં લવાયો હતો. મૃતક વિકેસના પિતાએ ટ્રક ચાલક સુરેશ તડવી વિરુદ્ધ સંખેડા પોલીસ મથકે ફરિયાદ નોંધાવી હતી.