શોધખોળ:પાવી જેતપુરમાં યુવાન વેપારી રહસ્યમય સંજોગોમાં ગુમ

પાવી જેતપુર ખાતે તળાવ ફળિયામાં રહેતા અને કાચા માલનો વેપાર કરતા યુવાન વેપારી દિવ્યેશ પુનમભાઇ પટેલ બે દિવસથી રહસ્યમય રીતે ગુમ થઈ ગયા છે. સોમવારે વહેલી સવારે લગભગ 8 વાગ્યે તે બાઇક લઇને ઘરેથી નીકળ્યા હતા, પરંતુ દુકાને પહોંચ્યા ન હતા.

તેમણે પોતાના મિત્ર ફૈઝાન સૈયદને વોટ્સએપ મેસેજ કરીને ઘરવાળાનું ધ્યાન રાખવાનું કહેતાં ફૈઝાને દિવ્યેશને વોટ્સએપ ફોન કરીને તું ક્યાં છે તેવું પૂછતાં કોઈ જવાબ ન આપીને ફોન કાપી કાઢ્યો હતો અને ફૈઝાન સૈયદને લોકેશન મોકલ્યું હતું. પરંતુ તપાસ કરતાં મળ્યા ન હતા. આ વાતની પરિવારજનોને ખબર પડતાં જ તેમની શોધખોળ હાથ ધરી હતી.

બે દિવસ થવા છતાં હજુ કોઈ ભાળ મળી ન હતી. દિવ્યેશભાઈના પિતા પૂનમભાઇએ પાવી જેતપુર પોલીસ મથકે પુત્ર દિવ્યેશ ગુમ થયાની ફરિયાદ આપતાં પોલીસે જાણવાજોગ દાખલ કરીને તેમની શોધખોળ હાથ ધરી છે.