ધરપકડ:વડુ પાસેથી શાકભાજીની આડમાં લઇ જવાતાં વિદેશી દારૂના જથ્થા સાથે બૂટલેગર ઝડપાયો

વડોદરા જિલ્લા એલસીબીની ટીમ શનિવારે મધરાતે પેટ્રોલિંગમાં હતી તે દરમિયાન બાતમી મળી હતી કે એક પીકઅપ ગાડીમાં વિદેશી દારૂની હેરફેર થાય છે. જે બાબતની માહિતી મળતા જિલ્લા એલસીબી પોલીસે વોચ ગોઠવી હતી. મહુવડ ચોકડી તરફથી વડુ ચોકડી તરફ આવતી પીકઅપને કોર્ડન કરીને ગાડીમાં બેઠેલા ડ્રાઇવર પંકજકુમાર રંગજી પારગી રહે. સામરીયા, પ્રતાપ નગર બાસવાડા, રાજસ્થાન. જેની પૂછતાછ કરતા સંતોષકારક જવાબ ન મળતા ગાડીની તપાસ કરવામાં આવતા પ્લાસ્ટિકના કોથળામાં વાસ મારતા ખરાબ કોબી ભરેલ મળી આવી હતી. જે શાકભાજીની આડમાં દારૂનો જથ્થો મળી આવ્યો હતો.

જેમાં રોયલ ક્લાસિક વિસ્કીના 180 મિલીના પાઉચ ભરેલી પેટી નંગ 38 જેમાં 1824 નંગ પાઉચ મળી આવ્યા હતા. જેની કિંમત રૂ.1,82,400 તેમજ મોબાઈલ-1 રૂપિયા 500 અને બોલેરો પીકઅપ ગાડીની કિંમત 3 લાખ મળી કુલ રૂ. 4,82,900નો મુદામાલ ઝડપી પાડ્યો હતો અને ડ્રાઇવરની ધરપકડ કરવામાં આવી હતી. જેની કોરોના રિપોર્ટ બાદ આગળની કાર્યવાહી કરવામાં આવશે. અત્રે ઉલ્લેખનીય છે કે દારૂનો જથ્થો આબુ રોડથી અશોકભાઈ પ્રજાપતિ નામના ઇસમે ભરી આપેલ અને વડુ પહોંચી અશોકભાઈ નામના ઇસમને ફોન કરી કે તેને દારૂનો જથ્થો આપવાનો હતો અને એ સમયે જ જિલ્લા એલસીબીએ ઝડપી પાડ્યો હતો.