આપઘાત:2 વ્યાજખોરોએ ઘરેણાં-ફોન પડાવતાં યુવકે ફિનાઇલ પીધું, યુવકે 28 હજાર લઇને સ્કૂટર ગિરવી મૂક્યું હતું

વાઘોડિયાના હનુમાનપુરા રોડ પર આશ્રમ વાટિકામાં રહેતા યુવકે શહેરના વ્યાજખોરો પાસે પોતાનું સ્કૂટર ગિરવી મૂક્યા બાદ બંને શખ્સે યુવકને વડોદરામાં બોલાવી રૂપિયા નહીં આપે ત્યાં સુધી સોનાનો પેન્ડલ સાથેનો દોરો, સોનાની 2 વીંટી, આઇફોન અને 5 હજારના 4 ચેક પડાવી લેતાં યુવકને લાગી આવ્યું હતું. તેણે ઘેર આવી ફિનાઇલ પી લઈ આપઘાતનો પ્રયાસ કરતાં તેને સારવાર માટે એસએસજીમાં ખસેડાયો હતો. યુવકે આ મામલે પોલીસને કરેલી અરજીમાં 2 વ્યાજખોરો સામે ફરિયાદ કરી હતી.

અનિકેત શુકલાલ રાઠોડે વાઘોડિયા પોલીસને જણાવ્યું હતું કે, તેણે 2020માં જાન્યુઆરીમાં 28 હજાર લઇને તેનું સ્કૂટર ગિરવી મૂક્યું હતું. ત્યારબાદ સાગર અને જબ્બારે તેને ફોન કરી સરદાર એસ્ટેટ પાસે ગરબા મેદાનમાં બોલાવી પોતાના બાકી નીકળતા રૂપિયા નહીં આપે ત્યાં સુધી સોનાનો પેન્ડલ સાથેનો દોરો, સોનાની 2 વીંટી, આઇફોન અને 5 હજારના 4 ચેક પડાવી લીધા હતા. જેથી અનિકેતને લાગી આવતાં તેણે ઘેર જઇને ગાડીની ડિકીમાં મૂકેલું ફિનાઇલ ગટગટાવી આપઘાતનો પ્રયાસ કર્યો હતો.

જેથી સારવાર માટે સયાજી હોસ્પિટલમાં ખસેડાયો હતો. જ્યાં તેની સારવાર ચાલી રહી છે.યુવકે આરોપ લગાવ્યો કે, રોહન અને પિયુશ નામના 2 શખ્સોએ વ્યાજના પૈસા ચૂકવી દીધા હોવા છતાં ખોટી રીતે ચેકો લગાવી ધમકી આપી ચેક પડાવી લીધા હતા. તેનો ઉપયોગ કરી ખોટા કેસમાં ફસાવી દેવાની પણ ધમકી આપી હતી. આ પ્રકારના આરોપ સાથે તેણે પોલીસ કમિશનરને પણ અરજી કરી હતી.