આત્મહત્યા પહેલાનો અંતિમ વિડિયો:નસવાડીમાં આપઘાત પહેલાનો યુવાનનો વિડિયો વાઈરલ, કહ્યું: 'મારી ઘરવાળી અવળા ધંધા કરતી હતી, તેણે દગો કર્યો છે, એટલે હું આત્મહત્યા કરું છું'

છોટાઉદેપુર જિલ્લાના નસવાડી તાલુકાના ઝેર ગામમાં પત્ની સાથેના ઝઘડાઓથી કંટાળીને ઝેર પીને આપઘાત કરતા પહેલા વિડિયો ઉતારીને સોશિયલ મીડિયામાં વાઈરલ કર્યો હતો અને ત્યાર બાદ આપઘાત કર્યો હતો. અંગે મૃતક યુવાનના પિતાએ નસવાડી પોલીસ સ્ટેશનમાં અરજી આપી છે અને ફરિયાદ કરવાની કાર્યવાહી હાથ ધરી છે.

પત્ની રિસાઇને પિયરમાં જતી રહી હતી
પતિ-પત્નીના ઘર કંકાશ તો ચાલતા જ હોય છે, પરંતુ, કેટલીક ઘટનાઓ એવી પણ હોય છે કે, માણસ ગુસ્સે થઈને ન કરવાનું કરી બેસે છે, ત્યારે આવી જ એક ઘટના છોટાઉદેપુર જિલ્લાના નસવાડી તાલુકાના ઝેર ગામમાં રહેતા વિજયભાઈ શાંતિલાલ રાઠવા કાઠિયાવાડ મજૂરી કામ કરતા હતા, ત્યારે તેમની પત્ની રિસાઈને તેના પિયર નસવાડી તાલુકાના છકતર ઉમરવામાં આવી ગઈ હતી.

યુવાને વિડિયોમાં પત્ની સામે કાર્યવાહી કરવાની માગ કરી
વિજયભાઇના બે સંતાન છે, જેમાં 4 વર્ષની પુત્રી એંજલ અને દોઢ વર્ષનો પુત્ર સ્વરજકુમાર છે, ત્યારે વિજયભાઈ પોતાની પત્નીને તેડવા પત્નીના પિયરમાં ગયા હતા, પરંતુ, તેમની પત્ની આવી નહોતી અને વિજયભાઈને માર માર્યો હતો. વિડિયોમાં યુવાને જણાવ્યું હતું કે, મારી સાથે પત્નીએ દગો કર્યો છે, એટલે હું આત્મહત્યા કરું છું, અને મારું આત્મહત્યા કરવાનું કારણ ફક્તને ફક્ત મારી ઘરવાળી છે અને તેના પર કાયદેસરની કાર્યવાહી કરવામાં આવે. તેવું આત્મહત્યા કર્યાં પહેલા વિડિયો સોશિયલ મીડિયામાં વાઇરલ થયો છે.

પિતાની અરજીને આધારે પોલીસે તપાસ શરૂ કરી
મૃતક વિજયભાઈના પિતા શાંતિલાલ રણછોડભાઇ રાઠવા નસવાડી પોલીસ સ્ટેશનમાં જાણવા જોગ ફરિયાદ આપી હતી. હવે નસવાડી પોલીસે આગળની તપાસ કરી કાયદેસરની કાર્યવાહી હાથ ધરી છે, ત્યારે હાલ તો બે બાળકો પરથી પિતાનો સહારો ઉઠી ગયો છે.