સી.આર.પાટીલ વડોદરાની મુલાકાતે:પંચાયત પેજ સમિતિ પ્રમુખોનો જુસ્સો વધારવા પાટીલ શહેરમાં

વડોદરા મહાનગરપાલિકાની ચૂંટણીમાં પેજ સમિતિના પ્રમુખોનું ફ્લોપ પ્રદર્શન બાદ હવે પંચાયતની પેજ સમિતિના 72 હજાર પ્રમુખોનો પારો ચઢાવવા માટે મંગળવારે ભાજપ પ્રદેશ પ્રમુખ સી.આર.પાટીલ વડોદરાની મુલાકાતે આવનાર છે. સયાજીપુરા સ્થિત પાંજરાપોળ મેદાન ખાતે મંગળવારે બપોરે 4 થી 5 વાગ્યા દરમિયાન પાટીલ 5 પેજ સમિતિના પ્રમુખોને આઈકાર્ડ આપશે. ત્યાર બાદ જિલ્લા ભાજપ કાર્યાલયથી કુલ 72 હજાર પ્રમુખોને આઈકાર્ડ અપાશે.

એરપોર્ટ પર પાટીલ પહોંચ્યા બાદ પાંજરાપોળ મેદાન સુધી બાઈક રેલી યોજાશે. જેમાં જિલ્લા ભાજપના 500 કાર્યકર્તાઓ બાઈક રેલીમાં જોડાશે. પાટીલના 1 કલાકના કાર્યક્રમમાં 5 હજાર કાર્યકરોને બોલાવાયા છે. પાટીલના કાર્યક્રમમાં પંચાયતની ચૂંટણીમાં ઊભા રહેલા ઉમેદવારો પૈકી પ્રત્યેક ઉમેદવારને 100 કાર્યકરો લાવવા માટે ટાર્ગેટ અપાયો છે. 20 ફેબ્રુઆરીએ આઈકાર્ડ વિતરણનો કાર્યક્રમ પાંજરાપોળ મેદાનમાં રાખ્યો હતો.જે રદ કરાયો હતો.