વિવાદ:ભંગાર કેમ લે છે કહી વેપારી પર ત્રિપુટીનો હુમલો

કરોડિયા રોડ પર ખોડિયાર પાર્ક સોસાયટી બહાર સ્ક્રેપના વેપારીને બોલાવી તું સુપર સ્ટોરમાંથી ભંગાર કેમ લે છે, તેમ કહી ત્રિપુટીએ માર માર્યો હતો. જેમાં એક હુમલાખોરે વેપારી પર લોખંડના પંચ વડે હુમલો કર્યો હતો. વેપારીએ જવાહરનગર પોલીસ મથકે ફરિયાદ નોંધાવી છે. કરોડિયા રોડ ખોડિયાર પાર્ક સોસાયટીમાં મુકેશ હરિરામ ખીંચી રહે છે. તેઓ સ્ક્રેપનો વેપાર કરે છે. શનિવારે તેઓ પોતાના ઘરે હતા તે સમયે પિન્ટુ ધર્માજી સામરિયાએ તેમને સોસાયટીના ગેટ બહાર બોલાવ્યા હતા.

જ્યાં પિન્ટુ ધર્માજી સામરિયા, તેનો પુત્ર અમરચંદ અને ગજાનંદ ખીંચી હાજર હતા. ધર્માજીએ મુકેશને તું સુપર સ્ટોરમાંથી કેમ ભંગાર લે છે, તેમ કહી તેની સાથે ઝઘડો કર્યો હતો. મુકેશે ટેન્ડર ભરીને 3 મહિનાથી ભંગાર લેતો હોવાનું જણાવતાં ધર્માજીએ તું ટેન્ડર કેમ ભરે છે, તેમ કહી ઝપાઝપી કરી હતી. ધર્માજીના પુત્ર અમરચંદે તેની પાસે રહેલા લોખંડના પંચ વડે મુકેશના મોઢા પર હુમલો કરતાં તે લોહીલુહાણ થયો હતો. જેને સારવાર માટે સયાજી હોસ્પિટલ લઈ જવાયો હતો. બનાવના પગલે મુકેશ ખીંચીએ જવાહરનગર પોલીસ મથકે ફરિયાદ નોંધાવી હતી.