હુમલો:યુવતીના ભાઇને વિધર્મી પિતા-પુત્રે હુમલો કરીને ધમકી આપી

શહેરના છાણી જકાતનાકા વિસ્તારમાં રહેતી યુવતીનો નંબર માગવાના મુદ્દે યુવતીના ભાઇએ બે વિધર્મી શખ્સની પૂછતાછ કરતાં ઉશ્કેરાયેલા વિધર્મી પિતા-પુત્રે યુવતીના ભાઇને માર માર્યો હતો. આ શખ્સો પૈકી એક જણાએ યુવતીની બહેનના ઘેર જઇને યુવતીનો નંબર માગ્યો હતો. જોકે બહેને નંબર આપવાનો ઇન્કાર કરતાં તેની સાથે પણ ગેરવર્તન કર્યું હતું. આ યુવતી 6 મહિના પહેલાં આ વિધર્મી યુવક સાથે જતી રહી હતી અને 4 મહિના બાદ ઘેર પરત ફરી હતી. ફતેગંજ પોલીસે આ મામલે ગુનો નોંધી તપાસ આદરી હતી.

છાણી જકાતનાકા પાસે રહેતા યુવકે ગુરુનાનક ચિસ્તિયાનગરમાં રહેતા મોહમંદ નબી ઇસ્લામનબી પઠાણ તથા ઝુબેર મોહમંદનબી પઠાણ સામે ફરિયાદ નોંધાવતાં જણાવ્યું હતું કે, તેની મોટી બહેન 6 મહિના પહેલાં ઝુબેર પઠાણ સાથે જતી રહી હતી અને 4 મહિના બાદ પરત આવી ગઇ હતી. બંને પક્ષે તે વખતે અંદરોઅંદર સમાધાન થયું હતું. ત્યારબાદ તેની બીજી બહેનના ઘેર ઝુબેર પઠાણ ગયો હતો અને યુવતીનો નંબર માગતો હોવાથી નાની બહેને મોટી બહેનનો નંબર આપવાની ના પાડી હતી અને તેની બહેન હાલ રાજસ્થાન હોવાનું જણાવ્યું હતું. જેથી ઝુબેર જતો રહ્યો હતો. ત્યારબાદ આ યુવક રાત્રે 9 વાગે તેની રિક્ષા લઇને ઘેર જતો હતો ત્યારે કનાક ચર્ચ ત્રણ રસ્તા પાસે ઝુબેર ઊભો હોવાથી યુવકે તું મારી બહેનનો નંબર કેમ માગતો હતો, તેમ પુછતાં ઝુબેરે ઉશ્કેરાઈ જઈ ઝઘડો કર્યો હતો. ત્યારબાદ ઝુબેરના પિતા મોહમંદ નબી પણ ત્યાં આવ્યા હતા અને બંનેએ ભેગા મળી યુવકને માર માર્યો હતો અને મારી નાખવાની ધમકી આપી હતી. ફતેગંજ પોલીસે આ મામલે ગુનો નોંધી તપાસ શરૂ કરી હતી.