તસ્કરી:વડસરના યુવાને ભાડે ફેરવવા આપેલી કાર લઈ ડ્રાઇવર ફરાર

વડસર રોડ પર રહેતા લારીધારકે આવકમાં વધારો થાય તે માટે નવી કાર લઈ પગાર પર ડ્રાઇવર રાખ્યો હતો. જોકે ડ્રાઇવર જ કાર લઈને ફરાર થતાં વારસિયા પોલીસ મથકમાં ફરિયાદ નોંધાવાઈ છે. વડસર રોડની જીઆઇડીસી કોલોનીમાં રહેતા મુપડેશ રાજુભાઈ મકરપુરા રોડ પર ખાણીપીણીની લારી ચલાવે છે. એક વર્ષ અગાઉ જાહેરાતના માધ્યમથી તેમની મુલાકાત કારેલીબાગ દર્શનપાર્ક સોસાયટીમાં રહેતા નિમેષ ચૌહાણ સાથે થઈ હતી. નિમેષ સાથે થયેલી મુલાકાતમાં મુપડેશભાઈએ જણાવ્યું હતું કે, તેમને કાર લઈ ભાડે મૂકવાની છે. જેથી નિમેષે જણાવ્યું હતું કે, પર સંગમ ચાર રસ્તા પરના કારના શો રૂમમાં તેની ઓળખાણ છે અને તમારી કાર વર્દીમાં મૂકી આપીશ અને 20 હજાર માસિક ભાડું મળી જશે. જેથી મુપડેશભાઈએ 90 હજાર રોકડા ભરી બાકીની લોન કરાવી નવી કાર ખરીદી હતી. જે કાર નિમેષને ભાડે આપી હતી અને ડ્રાઇવિંગ પણ તે જ કરતો હતો. મહિનો પૂરો થતાં રૂા. 20 હજાર ભાડું માગતા નિમેષે એક પણ વખત ભાડું આપ્યું નહતું. નિમેષ ચૌહાણ ફોન બંધ કરી ફરાર થતાં વારસિયા પોલીસ મથકે ફરિયાદ કરાઈ હતી.